Dhjetëra mijëra pjesëmarrës në festivalin e njohur ndërkombëtarisht Burning Man kanë mbetur të bllokuar në kampet e tyre në shkretëtirën e Nevadës pasi një stuhi shiu e ktheu terrenin e festivalit në një moçal me baltë.
Rrugët brenda dhe jashtë festivalit popullor u mbyllën që nga pasditja e së shtunës dhe shërbimet e linjave ajrore dhe autobusëve u pezulluan.
Organizatorët i përshkruan kushtet e pazakonta të motit si ‘të pabesa’ dhe u kërkuan pjesëmarrësve të strehohen në vende të tjera, duke paralajmëruar se ‘kushtet e pafavorshme të motit do vazhdojnë’.
“Porta brenda dhe jashtë Black Rock City mbeten të mbyllura. Hyrja dhe dalja ndalohen deri në një njoftim të dytë. Nuk lejohet vozitje përveç automjeteve të urgjencës. Nëse jeni tashmë këtu, kurseni ushqimin, ujin dhe karburantin dhe strehohuni në një hapësirë të ngrohtë dhe të sigurt. Më shumë përditësime do vijnë”, shkroi Burning Man Traffic të shtunën pasdite.
Sipas mediave vendase, më shumë se 73,000 njerëz morën pjesë në festival këtë vit. Megjithatë, mbetet e paqartë nëse ata do jenë në gjendje të largohen në fundin e planifikuar të ngjarjes, të njohur si Exodus, të hënën, dhe nëse jo, nëse kanë furnizime të mjaftueshme.
Disa pjesëmarrës thuhet se janë të shqetësuar për mbajtjen e ushqimit në temperatura të sigurta, pasi disa gjeneratorë nuk janë në gjendje të punojnë për shkak të motit. Raportohet se akulli po racionohet.
Shqetësime u ngritën edhe për servisimin e tualetit portativ. Shërbimi Ëi-Fi dhe celulari praktikisht nuk ekzistojnë në zonën e largët dhe pak njerëz kanë qasje në internetin satelitor për përditësime.
Ngjarja Black Rock City e njohur si Burning Man zhvillohet nga 27 gushti deri më 4 shtator në një shtrat të thatë liqeni në shkretëtirën Black Rock të Nevadës, rreth 80 milje në verilindje të Reno.
Ngjarja i kushtohet komunitetit, artit, vetëshprehjes dhe mbështetjes te vetja, duke arritur kulmin me djegien e një imazhi prej 40 këmbësh. Praktika filloi me djegien e një skeleti njeriu prej druri 2.5 metra të lartë në vitin 1986 në plazhin Baker të San Franciskos.
