Universiteti Xi’an Jiaotong, një nga universitetet më të mira të kërkimit publik në Kinë, ka konfirmuar se ka hequr kërkesën që studentët të kryejnë një test të detyrueshëm të anglishtes për t’u pranuar ose diplomuar.
Universiteti, i vendosur në provincën veriperëndimore të Shaanxi-t, ndërmori hapin teksa shpërtheu një debat rreth përfitimeve praktike të mësimit të anglishtes për një pjesë të madhe të studentëve të Kinës, raportoi të premten South China Morning Post.
Lëvizja është një ‘masë e zakonshme e bërë nga shkolla sipas zhvillimeve të fundit’, tha botimi, duke cituar komentet nga zyra e çështjeve akademike të universitetit. Xi’an Jiaotong, i cili konsiderohet të jetë ndër 5% të universiteteve më të mira në Kinë, shtoi se kurset e anglishtes bazuar në kërkesat e studentëve do mbeten në kurrikul.
Planet për të pakësuar kërkesat për studentët për të mësuar anglisht janë duke u rritur prej disa vitesh. Deputeti i Kongresit Kombëtar Popullor Tuo Qingming tha në fillim të këtij viti në një seancë legjislative në Pekin se të folurit rrjedhshëm të gjuhës angleze ka ‘pak vlerë praktike për shumë njerëz’.
Tuo shtoi: “Për një numër të konsiderueshëm njerëzish, mësimi i një gjuhe të huaj është vetëm për pranim në arsimin e lartë. Ajo që ata mësojnë është në fakt e orientuar drejt provimit. Ata rrallë ose kurrë nuk do të përdorin gjuhë të huaja në punën ose jetën e tyre.”
