Një ofensivë tokësore izraelite në Gaza ka të ngjarë të ndodhë vetëm pasi presidenti amerikan Joe Biden të përfundojë vizitën e tij në vend, raportoi të martën faqja gjermane e lajmeve Der Spiegel.
Gazeta gjermane citoi burime anonime duke sugjeruar se ka “shenja në rritje” se çdo plan për të suluar enklavën palestineze do jetë “pothuajse i pamundur” ndërsa Biden është në Izrael.
Raporti i Spiegel vjen disa orë pasi Shtëpia e Bardhë konfirmoi se Biden do të udhëtonte në Izrael dhe Jordani të mërkurën, si pjesë e përpjekjeve të Uashingtonit për të demonstruar mbështetjen e tij për Izraelin në konfliktin e tij me Hamas-in, duke lehtësuar gjithashtu çështjet humanitare në Gazën e shkatërruar nga lufta.
SHBA ka shprehur gjithashtu shqetësime për situatën që mund të përshkallzohet në një konflikt më të gjerë nëse fuqitë e tjera rajonale përfshihen.
“Të mërkurën, unë do udhëtoj në Izrael për të qëndruar në solidaritet përballë sulmit brutal terrorist të Hamas-it”, shkruhej herët të martën në një postim nga Biden në X (ish-Twitter).
“Më pas do të udhëtoj në Jordani për të adresuar nevojat e rënda humanitare, për t’u takuar me liderët dhe për të bërë të qartë se Hamas-i nuk mbështet të drejtat e palestinezëve për vetëvendosje.”
Izraeli ka grumbulluar mijëra trupa në kufirin e tij me Gazën për një operacion tokësor të pritur gjerësisht në enklavë. Masa është pjesë e lëvizjeve hakmarrëse kundër grupit militant palestinez Hamas, pas inkursionit të tij më 7 tetor në territorin izraelit. Rreth 1400 izraelitë, shumica e të cilëve civilë, u masakruan nga Hamas-i.
Forcat e armatosura të Izraelit kanë kryer një fushatë të paprecedentë bombardimi në enklavë në ditët në vijim. Forcat Ajrore izraelite deklaruan se hodhën më shumë se 6000 bomba në Gaza në gjashtë ditët e para të konfliktit. Raportet tregojnë se më shumë se 2,800 njerëz kanë vdekur në sulmet ajrore, ndërsa Kombet e Bashkuara (OKB) kanë thënë se të paktën një milion njerëz janë zhvendosur.
