Të paktën 102 anëtarë të stafit të Kombeve të Bashkuara janë vrarë në Gaza që nga fillimi i luftës, tha të hënën një agjenci e ndihmës e OKB-së që vepron në enklavë.
“Në 24 orët e fundit, një anëtare e stafit të UNRWA-s u vra me familjen e saj në veri të Rripit të Gazës për shkak të sulmeve, duke e çuar numrin e të vdekurve në më shumë se 100,” Agjencia e Kombeve të Bashkuara për Ndihmën dhe Punët për Refugjatët Palestinë (UNRWA).
Të paktën 27 anëtarë të stafit janë plagosur gjithashtu që nga fillimi i luftës, tha ajo.
Zyrat e OKB-së në mbarë botën ulën flamujt e tyre në gjysmështizë dhe stafi i OKB-së mbajti një moment heshtje të hënën për të vajtuar dhe nderuar kolegët e tyre të vrarë në Gaza.
“Ata nuk do harrohen kurrë,” tha Sekretari i Përgjithshëm i OKB-së Antonio Guterres, i cili drejtoi një minutë heshtje nga selia e OKB-së në Nju Jork.
UNRWA tha se të vrarët ishin mes 13,000 punonjësve të saj që punonin në Gaza dhe shumë prej tyre kishin vdekur së bashku me familjet e tyre gjatë bombardimeve dhe bllokadës së pandërprerë të territorit palestinez nga Izraeli pas sulmit të 7 tetorit nga militantët e Hamasit.
“Ata ishin mësues, drejtorë shkollash, punonjës shëndetësorë, duke përfshirë një gjinekolog, inxhinierë, staf mbështetës dhe një psikolog”, thuhet në deklaratë.
Punonjësit e ndihmës së OKB-së janë në mesin e të paktën 11,180 njerëzve të vrarë në sulmet ajrore izraelite, duke përfshirë 4,609 fëmijë, sipas Ministrisë palestineze të Shëndetësisë në Ramallah, e cila merr shifrat e saj nga territori i kontrolluar nga Hamasi.
Lufta e fundit shpërtheu pas sulmeve terroriste të 7 tetorit nga Hamas, ku militantët vranë të paktën 1400 njerëz në Izrael dhe morën më shumë se 200 pengje.
UNRWA është agjencia kryesore e OKB-së që vepron në Gaza dhe po strehon rreth 780,000 njerëz në më shumë se 150 objekte të mbipopulluara, edhe pse shërbimet bazë janë shkatërruar.
