Më shumë se 10,000 civilë janë vrarë në Ukrainë që nga pushtimi i Rusisë në shkurt 2022, me rreth gjysmën e vdekjeve që kanë ndodhur shumë prapa vijës së frontit, tha të martën Zyra e OKB-së për të Drejtat e Njeriut.
Misioni i OKB-së për të drejtat e njeriut në Ukrainë, i cili ka dhjetëra vëzhgues në vend, tha se pret që numri i vërtetë të jetë “dukshëm më i lartë” se sa shifra zyrtare pasi puna në terren është në vijim.
Kjo përfshin ngjarjet në muajt e parë pas pushtimit, si beteja për kontrollin e Mariupolit, ku banorët raportuan viktima të larta civile.
“Dhjetë mijë vdekje të civilëve është një moment historik i zymtë për Ukrainën,” tha Danielle Bell, e cila kryeson misionin e monitorimit.
“Lufta e Federatës Ruse kundër Ukrainës, duke hyrë tashmë në muajin e saj të 21-të, rrezikon të kthehet në një konflikt të zgjatur, me koston e rëndë njerëzore që është e dhimbshme për t’u kuptuar”, tha ajo.
Shumica dërrmuese e vdekjeve janë shkaktuar nga armë shpërthyese me ndikim në një zonë të gjerë, si predha, raketa dhe municione thërrmuese, thanë Kombet e Bashkuara.
Gati gjysma e vdekjeve në tre muajt e fundit kanë ndodhur shumë përtej vijave të frontit, tha OKB, duke ia atribuuar këtë përdorimit të raketave me rreze të gjatë veprimi nga forcat ruse dhe shpërthimit të vonuar të minave të braktisura.
