Donald Trump e sekretarja demokrate e Maine, Shenna Bellows
Sekretarja demokrate e Shtetit në Maine, Shenna Bellows, skualifikoi të enjten ish-presidentin Donald Trump nga votimi i shtetit të vitit 2024, duke përmendur klauzolën e kryengritjes së Amendamentit të 14-të.
Zëdhënësi i fushatës së Trump, Steven Cheung e kritikoi vendimin, duke e quajtur Bellows një “të majtë virulente” dhe “demokrate hiperpartizane që mbështet Biden-in”, në një deklaratë për The Post.
Ai tha se fushata “do paraqiste shpejt një kundërshtim ligjor në gjykatën shtetërore për të parandaluar hyrjen në fuqi të këtij vendimi mizor në Maine”.
“Nuk arrij lehtë në këtë përfundim. Demokracia është e shenjtë”, shkroi Bellows në vendimin e saj prej 34 faqesh mbi ankesat e shumta që sfidonin kualifikimin e 77-vjeçarit Trump për zgjedhjet paraprake në Maine bazuar në veprimet e tij që çuan në trazirat e 6 janarit 2021 në Kapitolin e SHBA-së.
“Unë jam e vetëdijshme se asnjë Sekretar Shteti nuk ka privuar ndonjëherë një kandidat presidencial nga qasja në votim bazuar në seksionin e tretë të amendamentit të 14-të. Megjithatë, kam parasysh gjithashtu se asnjë kandidat presidencial nuk është përfshirë më parë në kryengritje,” tha ajo, duke e quajtur trazirat në Kapitol “të pashembullta dhe tragjike”.
“Ato ishin një sulm jo vetëm ndaj Kapitolit dhe zyrtarëve të qeverisë, por edhe një sulm ndaj shtetit të së drejtës. Provat këtu tregojnë se ato ndodhën me urdhër dhe me dijeninë e mbështetjen e Presidentit në largim,” argumentoi Bellows.
“Kam arritur në përfundimin se Rosen dhe Royal Challengers kanë përmbushur barrën e tyre…Ata kanë ofruar prova të mjaftueshme për të treguar falsitetin e deklaratës së z. Trump se ai përmbush kualifikimet e zyrës së presidencës. Unë konstatoj se peticioni parësor i z. Trump është i pavlefshëm,” vendosi ajo.
Bellows vuri në dukje se vendimi i saj do pezullohej derisa Gjykata e Lartë e Maine të vendosë mbi apelimin e pritshëm të fushatës së Trump.
Zgjedhjet paraprake republikane në Maine do zhvillohen më 5 mars.
Vendimi i Bellows vjen pasi Gjykata e Lartë e Kolorados vendosi në fillim të këtij muaji se Trump ishte i papërshtatshëm bazuar në të njëjtat arsye të Amendamentit të 14-të.
Në të kundërt, Gjykata e Lartë e Miçiganit kundërshtoi skualifikimin e ish-presidentit, duke argumentuar se sekretari i shtetit i shtetit nuk ka autoritetin ligjor për të hequr kandidatët e nominuar nga partitë politike për zgjedhjet paraprake.
Ndryshe nga Kolorado dhe Michigan, procesi i Maine për të drejtën e votimit diskutohet fillimisht nga sekretari i shtetit përpara se gjykatat të përfshihen në vendim.
Avokatët e Trump kërkuan pa sukses të skualifikonin Bellows nga vendimi mbi sfidat për të drejtën e votimit të Trump, duke treguar postimet e saj të mëparshme në mediat sociale si provë se ajo “ka arritur tashmë në përfundimin se Presidenti Trump ishte i përfshirë në kryengritje”.
Për shembull, më 13 shkurt 2021, Bellows postoi në Tëitter se trazirat e 6 janarit 2021 në Kapitol ishin një “kryengritje” dhe “një përpjekje e paligjshme për të përmbysur rezultatet e një zgjedhjeje të lirë dhe të ndershme”.
“Një vit pas kryengritjes së dhunshme, është e rëndësishme të bëjmë gjithçka mundemi për të mbrojtur zgjedhjet tona,” shkroi ajo më 6 janar 2022.
“Sekretarja e Shtetit në Maine është një ish-avokate e ACLU-së, një majtiste virulente dhe një demokrate hiperpartizane që mbështet Biden-in, i cili ka vendosur të ndërhyjë në zgjedhjet presidenciale në emër të Joe Biden-it të pandershëm”, tha Cheung për The Post.
Zëdhënësi i fushatës Trump, Cheung
“Ne jemi dëshmitarë në kohë reale të tentativës së vjedhjes së zgjedhjeve dhe heqjes së të drejtës së votës së votuesit amerikan. Demokratët në shtetet e tyre po pezullojnë në mënyrë të pamatur dhe jokushtetuese të drejtat civile të votuesve amerikanë duke u përpjekur të heqin në mënyrë të njëzëshme emrin e Presidentit Trump nga fleta e votimit. Mos bëni gabim, këto përpjekje partizane për ndërhyrje në zgjedhje janë një sulm armiqësor ndaj demokracisë amerikane. Biden dhe demokratët thjesht nuk i besojnë votuesit amerikanë në zgjedhje të lira dhe të ndershme dhe tani po mbështeten në forcën e institucioneve qeveritare për të mbrojtur kontrollin e tyre në pushtet,” shtoi ai.
Zëdhënësi i fushatës së Trump argumentoi se sfidat e panumërta të Amendamentit të 14-të ndaj kandidaturës së Trump janë “në keqbesim” dhe “false”, duke vënë në dukje vendimet e gjykatave në Michigan, Minesota, Neë Hampshire, Arizona, Florida, Rhode Island dhe Virxhinia Perëndimore.
“Ne e dimë se si Kushtetuta ashtu edhe populli amerikan janë në anën tonë në këtë luftë,” tha Cheung. “Fushata dominuese e Presidentit Trump ka një epërsi komanduese në sondazhe, e cila është zgjeruar në mënyrë dramatike pasi presidenca e Joe Biden vazhdon të dështojë”. – shtoi ai.
Dy nga rivalët kryesorë republikanë të Trump dolën menjëherë në mbrojtje të tij dhe kritikuan vendimin e sekretarit të shtetit të Maine.
“Kështu duket tamam një kërcënim për demokracinë,” shkroi sipërmarrësi Vivek Ramaswamy në X. “Nëse sistemi është i zoti ta heqë këtë njeri, atëherë Kushtetuta s’ka asnjë vlerë.”
Ai shtoi se do t’i qëndrojë zotimit të tij të mëparshëm për t’u “tërhequr nga votimi i çdo shteti që përfundimisht largon Trumpin” dhe u bëri thirrje kundërshtarëve të tij të bëjnë të njëjtën gjë.
Guvernatori republikan i Floridës Ron DeSantis tha se “ideja që një burokrat në një pozicion ekzekutiv thjesht mund të skualifikojë në mënyrë të njëanshme dikë nga detyra, duke bërë çfarë i thotë koka, heq çdo nocion të procesit të rregullt kushtetues që ky vend i ka respektuar gjithmonë për më shumë se 200 vjet.”
“Kjo hap Kutinë e Pandorës,” argumentoi ai gjatë një interviste me Fox News.
“A mund të keni një sekretar republikan të shtetit që të skualifikojë Biden-in nga votimi sepse ai ka lënë 8 milionë emigrantë në mënyrë të paligjshme?”
DeSantis shtoi se ai nuk beson se vendimi i Maine dhe sfidat e tjera për qasjen e Trump në fletën e votimit do arrijnë të rezistojnë në Gjykatën e Lartë.
Ron DeSantis
Kryetarja e Konferencës së republikanëve në Kongres, Elise Stefanik, e quajti vendimin e Bellows një “akt korruptiv” dhe një shembull “të paligjshëm” të “demokratëve radikalë të dëshpëruar që po përdorin si armë qeverinë kundër Presidentit Trump”.
“Sekretarja e Shtetit, demokratja e ekstremit të majtë në Maine sapo e hoqi në mënyrë të njëanshme Presidentin Trump nga fleta e votimit”, tha Stefanik në një deklaratë.
“Kjo është ndërhyrje në zgjedhje, shtypje e votuesve dhe një sulm i hapur ndaj demokracisë. Gjykata e Lartë duhet ta rrëzojë këtë veprim të paprecedentë dhe antikushtetues tani.”
Klauzola e skualifikimit e përdorur rrallë u përfshi në Amendamentin e 14-të të pas Luftës Civile si një mjet për të parandaluar ish-zyrtarët e Konfederatës të bëheshin zyrtarë të zgjedhur dhe të merrnin përsipër qeveritë e shtetit dhe qeverinë federale.
“Amendamenti u shkrua për t’u marrë me ata që përfshihen në një rebelim që shkakton qindra mijëra vdekje,” tha profesori i drejtësisë në Universitetin George Washington, Jonathan Turley në fillim të këtij viti, duke i quajtur përpjekjet për të ndaluar Trump nga fletëvotimet duke cituar klauzolën e kryengritjes “jo thjesht të dyshimta. por e rrezikshme.”
Të enjten, Turley tha se vendimi i Maine “tregon pse Gjykata Supreme duhet të vendosë shpejt, qartë dhe me shpresë njëzëri në hedhjen poshtë të kësaj teorie të dëmshme”.
VINI RE: Ky material është pronësi intelektuale e NY Post
Përgatiti për Hashtag.al, Klodian Manjani
