Një video tronditëse kapi çastin kur një turmë emigrantësh goditi dy policë pranë Times Square në New York gjatë fundjavës, megjithatë të dyshuarit u liruan më vonë, shkruan New York Post.
Pamjet tregojnë një oficer dhe toger të policisë së New York-ut duke u thënë fillimisht emigrantëve të lëvizin më tej.
Pak çaste me pas ngjarja merr një tjetër rjedhë pasi shpërthen një përleshje mes dy policëve dhe një të dyshuari, i cili vihet poshtë nga oficerët.
Megjithatë shokët e personit në fjalë ndërhyjnë duke qëlluar policët me grushte e shkelma ndërsa ata përpiqen të mbrohen. Videoja tregon dy oficerët e mbetur në tokë ndërsa grupi më pas largohet.
Policia fillimisht arrestoi katër nga azilkërkuesit, të identifikuar nga burimet si Darëin Andres Gomez Izquiel, 19 vjeç, Kelvin Servat Arocha, 19, Juarez Wilson, 21 dhe Yorman Reveron, 24 vjeç.
Të katër u akuzuan për sulm dhe u liruan pa kusht, thanë burimet.
Një i dyshuar i pestë, Jhoan Boada, 22 vjeç, u arrestua të hënën mbrëma dhe u akuzua për tentativë sulmi ndaj një oficeri policie, sipas burimeve policore.
Zyra e Prokurorit të Qarkut të Manhattan tha se është ende duke hetuar incidentin dhe duke shqyrtuar videon shtesë të sulmit të supozuar.
Dy policët e sulmuar, të cilët nuk janë identifikuar, kanë pësuar lëndime të lehta dhe janë trajtuar në vendngjarje. Njëri ka pësuar prerje në fytyrë, ndërsa tjetri kishte mavijosje në trup, shkruan NY Post.
