Michelle O’Neill, nacionalistja e parë irlandeze që është emëruar ndonjëherë si udhëheqëse e Irlandës së Veriut, ka thënë se ajo parashikon që një referendum mbi bashkimin e Irlandës të zhvillohet brenda 10 viteve të ardhshme.
Në një intervistë me Sky News të dielën, O’Neill vuri në dukje se fushata e saj bazohej në të qenit “kryeministrja e të gjithëve”.
“Unë dëshiroj të jem bashkuese. Dua t’i bashkoj njerëzit,” theksoi ajo.
Kur u pyet nëse ajo pajtohet me deklaratën e udhëheqëses së partisë së saj Mary Lou McDonald, se një Irlandë e Bashkuar është “në largësi të prekshme”, O’Neill tha se ajo beson se Irlanda e Veriut po përjeton “një dhjetëvjeçar mundësie në këtë drejtim.”
“Ka kaq shumë gjëra që po ndryshojnë të gjitha normat e vjetra: natyra e shtetit, fakti që një republikan nacionalist nuk duhej të ishte kurrë kryeministër. E gjithë kjo flet për atë ndryshim.”
Sipas kushteve të Marrëveshjes së së Premtes së Mirë të nënshkruar midis Mbretërisë së Bashkuar dhe qeverive irlandeze në 1998 për t’i dhënë fund dhunës sektare prej dekadash, Sekretari i Shtetit për Irlandën e Veriut duhet të bëjë thirrje për një votim kufitar (një referendum mbi bashkimin irlandez) nëse “një shumicë e atij votimi do shprehte një dëshirë” që Irlanda e Veriut “duhet të largohet nga Mbretëria e Bashkuar dhe të bashkohet me një Irlandë të bashkuar”.
