Protestat nga fermerët polakë ndezën zemërim në Ukrainën fqinje të martën, pasi Kievi i bëri thirrje Komisionit Evropian të ndërmarrë veprime të forta pasi demonstruesit bllokuan kufirin dhe hapën vagonat hekurudhore për të lënë grurin të derdhej.
Varshava ka qenë një mbështetëse e vendosur e Kievit në luftën e tij për të zmbrapsur një pushtim të plotë rus të nisur në vitin 2022, por protestat nga fermerët që ankohen për konkurrencë të pandershme kanë tensionuar lidhjet që tashmë ishin në nivele të larta, pasi kamionistët bllokuan kalimet kufitare rreth fundit të vitit.
Protestat e fermerëve të së martës shënuan një përshkallëzim nga demonstratat e mëparshme, me një bllokadë pothuajse të plotë të të gjitha pikave kufitare të Ukrainës dhe ndërprerje në portet dhe rrugët në mbarë vendin.
Pamjet televizive treguan protestuesit në vendkalimin kufitar Medyka duke hapur vagonët hekurudhorë për të lejuar që gruri të derdhej në shina.
“Shpërndarja e grurit ukrainas në shinat hekurudhore është një tjetër provokim politik që synon të ndajë kombet tona,” tha zëvendëskryeministri ukrainas Oleksandr Kubrakov në një postim në X.
Ministrja e Ekonomisë e Ukrainës, Yulia Svyrydenko tha se Kievi ka informuar Komisionin Evropian për veprimet e protestuesve polakë në kufirin ukrainas dhe priste një përgjigje të fortë. Ministri i Bujqësisë Mykola Solskyi tha se drithi ishte drejtuar për në Gjermani dhe nuk do kishte hyrë në tregun polak.
Fermerët në gjithë Evropën kanë protestuar mbi një sërë ankesash, duke përfshirë kufizimet e vendosura mbi ta nga masat e Bashkimit Evropian për të trajtuar ndryshimet klimatike, dhe atë që ata thonë se është konkurrencë e pandershme nga jashtë, veçanërisht Ukraina, pas një vendimi të BE-së në vitin 2022 për të hequr dorë nga detyrimet për importet e ushqimeve ndaj Ukrainës.
Traktorët e protestuesve mbanin pankarta që shkruanin: “Me rrjedhjen e grurit nga Ukraina, fermerët polakë do të falimentojnë”.
