Policia greke ka arrestuar në Dhiavata të Selanikut, shtetasin Adriatik Xhini, 32 vjeç, i cili ishte në kërkim nga Interpol Tirana. Xhini, i cili është nga Ksamili, kërkohej në Shqipëri për veprën penale të “prodhimit dhe shitjes së narkotikëve” për ngjarje të ndodhura në periudhën 1 prill 2019 – 23 prill 2020.
Autoritetet greke njoftuan se Xhini ishte shpallur në kërkim nga policia e Sarandës pasi u sekuestrua një çantë me 22 kg marijuanë në kufirin shqiptaro-grek, në vendin e quajtur “Likojani” në Konispol. Në të njëjtin operacion, u arrestuan dy transportues nga Berzhita e Tiranës dhe Polisi i Librazhdit, ndërsa Xhini dhe shtetasi D. A. u shpallën në kërkim.
Kjo nuk është hera e parë që Xhini ka pasur kontakt me autoritetet për akte të paligjshme. Ai është arrestuar më herët në vitin 2018 nga policia e Sarandës në kuadër të operacionit “Transferimi”, në lidhje me gjetjen e shtatë dozave kokainë dhe një sasi prej 18 kg marijuanë në Ksamili. Megjithatë, ai u lirua më vonë nga Gjykata e Sarandës.
Përveç kësaj, Xhini është dënuar më herët nga Gjykata e Sarandës në vitet 2013 dhe 2014 për shkelje të ndryshme ligjore, duke përfshirë kundërshtimin e punonjësit të policisë, plagosjen e lehtë me dashje, shkatërrimin e pronës dhe drejtimin e mjeteve pa patentë. Gjatë arrestimit në vitin 2015, ai u gjet i armatosur me një dorezë metalike.
