Agron Puka, 54-vjeç ka mbetur i plagosur pasi është qëlluar me armë zjarri në drejtim të tij teksa po udhëtonte me makinë.
Ngjarja ka ndodhur mëngjesin e sotëm (6 mars), në fshatin Rrilë të Lezhës, pranë një shkollë, ku 54-vjeçari sapo kishte lënë fëmijët.
Ai është zënë në pritë nga autorët të cilët kanë qenë me një Audi të bardhë, dhe kanë hapur zjarr në drejtim të tij kur viktima po udhëtonte me makinën tip ‘Audi’.
Nga informacionet makina është qëlluar me breshëri plumbash, ndërsa një plumb kapi Agron Pukën.
Gjithashtu bëhet me dije se autorët kanë qenë 4 persona, 3 prej tyre kanë zbritur nga makina tip ‘Audi’ dhe kanë hapur zjarr në drejtim të 54-vjeçarit.
Ky i fundit nuk raportohet të ketë precedent të mëparshëm penal, ndërsa mësohet se ka një fermë blegtorale në Balldren të Lezhës.
Ngjarja ka krijuar frikë dhe panik edhe të nxënësit dhe mësuesit e shkollës 9-vjeçare ‘Marash Gjoni’ në Rrilë, pasi nga të shtënat janë rrezikuar edhe nxënësit.
Agron Puka ndodhet në spital e sipas policisë është jashtë rrezikut për jetën.
“Rreth orës 08:00, në fshatin Rrilë, shtetasi A. P., 54 vjeç, banues në fshatin Rrilë, duke lëvizur me automjet, është plagosur me armë zjarri nga 1 person ende i paidentifikuar. 54-vjeçari është transportuar në spitalin rajonal të Lezhës, ku është në kujdesin e mjekëve (aktualisht jashtë rrezikut për jetën).
Shërbimet e Policisë, me marrjen e njoftimin, kanë shkuar menjëherë ne vendngjarje, është rrethuar zona dhe janë ngritur pika kontrolli.
Njëkohësisht, në ndihmë të Policisë vendore, janë nisur Forcat Kombëtare të Sigurisë të Njësisë Shkodër. Grupi hetimor, në drejtimin e Prokurorisë, vijon punën për sqarimin e rrethanave të ngjarjes dhe për identifikimin dhe kapjen e autorit.”– njofton policia.
