Një ish-inxhinier softueri i Google është akuzuar për vjedhje të sekreteve tregtare të lidhura me inteligjencën artificiale ndërsa punonte për konkurrentët kinezë që kërkonin të fitonin përparësi në garën e AI.
Shtetasi kinez Linwei Ding u akuzua nga një juri e madhe federale në San Francisko me katër akuza për vjedhje të sekretit tregtar, secila e dënueshme me deri në 10 vjet burg. Ai u arrestua në mëngjesin e 6 marsit në qytetin Newark të Kalifornisë, ku jeton.
38-vjeçari dyshohet se ka vjedhur mbi 500 dosje që përmbajnë informacion konfidencial midis majit 2022 dhe majit 2023, duke përfshirë informacion të hollësishëm në lidhje me infrastrukturën e harduerit dhe platformat softuerike që lejojnë qendrat e të dhënave superkompjuterike të Google të trajnojnë modele të mëdha të inteligjencës artificiale përmes mësimit të makinerive, sipas aktakuzës.
Brenda disa javësh pasi Ding filloi vjedhjen, thuhet në aktakuzë, një kompani kineze me fokus në AI i ofroi ta bënte atë shefin e teknologjisë. Pozicioni erdhi me një pagë mujore prej rreth 14,800 dollarë me një bonus vjetor dhe aksione të kompanisë.
Në fund të tetorit, Ding udhëtoi për në Kinë dhe qëndroi atje deri në marsin e ardhshëm, duke marrë pjesë në takimet e investitorëve për të mbledhur kapital për firmën, Beijing Rongshu Lianzhi Technology.
Në maj 2023, ai themeloi një start-up të AI në Shangai.
Ai gjithashtu ngarkoi një punonjës tjetër të Google që të skanonte distinktivin e tij të hyrjes në punë në tri ditë të veçanta në dhjetor 2023 për të krijuar përshtypjen se ai ishte duke punuar nga zyra e Google në SHBA kur, në fakt, ishte në Kinë, zbuluan hetuesit e Google pas këqyrjes së pamjeve të vëzhgimit.
Ding fillimisht arriti t’i shmangej zbulimit të Google duke kopjuar të dhënat e Google në aplikacionin Apple Notes në MacBook-in e tij të lëshuar nga Google, më pas duke e kthyer atë në PDF për t’i ngarkuar në llogarinë e tij personale të Google Cloud.
Por në dhjetor 2023, kur ai ngarkoi dosje shtesë nga rrjeti Google në një llogari tjetër personale ndërsa ishte në Kinë, Google dyshoi.
Ai më pas i tha një hetuesi të Google se kishte për qëllim të përdorte informacionin si provë të punës që kishte kryer në Google, sipas aktakuzës.
Ding nuk zbuloi asnjë nga lidhjet e tij me firmat me bazë në Kinë me Google, thanë prokurorët.
Më pak se një javë më vonë, ai rezervoi një biletë me një drejtim për në Pekin, e planifikuar për në 7 janar. Më pas ai dha dorëheqjen nga Google më 26 dhjetor.
Google mori laptopin dhe pajisjen celulare të Ding nga shtëpia e tij një ditë përpara nisjes së tij të planifikuar më 4 janar.
Vjedhja e inovacionit të SHBA
Prokurori i Përgjithshëm Merrick Garland zbuloi hollësitë e çështjes në një konferencë të Shoqatës së Avokatëve Amerikanë në San Francisko të mërkurën pasdite.
“Ne do mbrojmë ashpër teknologjitë e ndjeshme të zhvilluara në Amerikë nga rënia në duart e atyre që nuk duhet t’i kenë ato,” tha ai.
Drejtori i FBI-së, Christopher Wray tha se akuzat ishin “tregimi më i fundit i asaj që degët e kompanive me bazë në Kinë janë të gatshme të bëjnë për të vjedhur inovacionin amerikan”.
“Vjedhja e teknologjisë inovative dhe sekreteve tregtare nga kompanitë amerikane mund të kushtojë vende pune dhe të ketë pasoja shkatërruese ekonomike dhe të sigurisë kombëtare”, tha ai në një deklaratë.
Zëvendësprokurorja e Përgjithshme Lisa Monaco në një fjalim muajin e kaluar tha se AI është një përparësi kryesore për grupin e punës, duke e përshkruar atë si “teknologjia e fundit e ndjeshme”.
