Fëmijë që qëllojnë fëmijët e tjerë me kallashnikov. Adoleshentë që shkarkojnë kokainën nga kontejnerët në porte. Dhe një dhomë torture qëndron e fshehur mes kontejnerëve të transportit në një pyll holandez.
Ky është realiteti i ri për pjesët e Evropës të goditura nga numri rekord i drogës së paligjshme që derdhet brenda dhe jashtë kontinentit. Një treg droge që tani ka vlerë dhjetëra miliarda euro po nxit bandat ndërluftuese për të përdorur nivele “të papara” të dhunës kundër njëra-tjetrës, paralajmëruan të enjten bosët e politikës evropiane.
Gjetjet u zbuluan në një konferencë për shtyp të mbajtur nga agjencia evropiane e zbatimit të ligjit, Europol, dhe Qendra Evropiane e Mbikëqyrjes për Drogën dhe Varësinë nga Drogat (EMCDDA) për të zbuluar pasqyrën e tyre më të fundit të tregut evropian të drogës, të cilin ata e vlerësuan në rreth 30 miliardë euro në vit.
Importet e kokainës dhe eksportet e ekstazisë arritën secili shifra rekord në vitin 2022. Shumica e dhunës lidhet me kokainën dhe kanabisin, thanë agjencitë.
Ndërsa autoritetet nuk dhanë statistika për shkallën e problemit, Alexis Goosdeel, drejtori i EMCDDA, tha se Evropa tani po sheh një nivel të ri dhune të lidhur me drogën, të ngjashme me atë në Amerikën Qendrore.
“Është pjesë e realitetit të përditshëm në Bashkimin Evropian,” tha ai.
Drejtoresha Ekzekutive e Europolit, Catherine De Bolle, tha: “Ne gjetëm edhe dhoma torture në BE”.
“Këtë nuk e kemi parë kurrë më parë. Kjo është përdorur në Amerikën Latine, por jo në BE”, tha ajo në konferencën për shtyp.
De Bolle nuk e specifikoi rastin të cilit i referohej, por ka pasur vetëm një zbulim publik të të ashtuquajturave kontejnerë torture në Evropë, pranë portit të Roterdamit në vitin 2020. Disa burra janë kapur dhe dënuar me burg në lidhje me atë rast.
Chris Dalby, drejtori i konsulencës me bazë në Hollandë, ‘Ëorld of Crime’, tha për POLITICO se ndërsa është “e pamundur të dihet” se sa të përhapura janë dhomat e torturës në Evropë, rasti ishte “sigurisht një alarm zgjimi për ashpërsinë në rritje të dhunës së bandave në Evropë”.
Një shqetësim tjetër në rritje është mosha e njerëzve që punojnë në tregje të paligjshme. Bandat në Marsejë po punësojnë gjithnjë e më shumë adoleshentë si vëzhgues të lëvizjeve të policisë ose për të shitur drogë, duke çuar në vrasjen e fëmijëve me armë zjarri mes të cilave edhe kallashnikov.
Autoritetet në portet belge e holandeze të Antwerp-it dhe Roterdamit kanë kapur dhjetëra adoleshentë të cilët ishin paguar për të nxjerrë ngarkesa kokaine nga kontejnerët e transportit.
“Familje të tëra po jetojnë nga të ardhurat që marrin nëpërmjet të rinjve që punojnë për grupet kriminale,” tha De Bolle i Europol.
Reagimi i paqartë
Përgjigjet zyrtare kanë qenë të përziera, me disa politikanë që bëjnë thirrje për dënime më të ashpra dhe buxhete më të mëdha të sigurisë, ndërsa të tjerë argumentojnë se ndalimi i drogës thjesht nuk funksionon dhe se ka ardhur koha për të legalizuar tregun.
“Rregullimi i tregut, monopolet e qeverisë ose ofrimi për qëllime mjekësore janë vetëm disa nga alternativat e mundshme, jo domosdoshmërisht ekskluzive,” shkroi kryebashkiakja e Amsterdamit Femke Halsema në një opinion në janar për britaniken ‘The Guardian’, duke paralajmëruar se Holanda rrezikon të kthehet në një “narkoshtet”.
Belgjika dhe presidenca e saj e Këshillit të BE-së synojnë dhe po drejtojnë një rrugë më tradicionale, duke u përqendruar në forcimin e sigurisë në porte dhe rritjen e bashkëpunimit me sektorin privat përmes Aleancës së Porteve Evropiane të sapokrijuar.
Ministrja e Brendshme belge, Annelies Verlinden udhëtoi në Bolivi në shkurt, ku nënshkroi një deklaratë të përbashkët me vendet e Amerikës Latine “për të trajtuar në mënyrë efektive të gjitha aspektet e çështjes globale të drogës” gjatë pesë viteve të ardhshme.
Megjithatë, disa vende të Amerikës Latine, mes të cilave Kolumbia dhe Ekuadori, kanë sugjeruar që udhëheqësit evropianë duhet të shikojnë më afër shtëpisë. Qytetet si Brukseli, Amsterdami, Lisbona dhe Tarragona kanë ndër normat më të larta të përdorimit të kokainës për frymë në tokë, sipas shifrave të EMCDDA-së.
Është një përgjegjësi për të cilën evropianët duhet të jenë të vetëdijshëm, tha Goosdeel, edhe pse theksoi se përdoruesit e drogës nuk duhet domosdoshmërisht të trajtohen si kriminelë.
“Nuk është koha për të nisur një luftë kundër konsumatorëve. Është një luftë për të mbrojtur qytetarët tanë”, tha ai.
VINI RE: Ky material është pronësi intelektuale e Politico
Përgatiti për Hashtag.al, Klodian Manjani
