Një procesion fetar në qendër të Barcelonës festoi rënien e shiut të shumëpritur, pas nëntë ditësh lutjeje për lehtësim nga një thatësirë e madhe që ka pllakosur rajonin e pjesë të mëdha të Spanjës.
Rreth 100 banorë vendas morën pjesë në ceremoninë katolike në mbrëmjen me shi të së shtunës.
Ata mbanin figurën e Krishtit, duke gjarpëruar nëpër lagjen e vjetër të qytetit për dy orë të udhëhequr nga Kryepeshkopi Joan Josep Omella.
“Jemi pak, por s’ka rëndësi,” tha Omella brenda Santa Maria del Pi, një kishë gotike e shekullit të 15-të, pak para se të largohej, ndërsa jashtë shiu binte.
Muajin e kaluar, zyrtarët në rajonin verilindor spanjoll të Katalonjës, qyteti kryesor i të cilit është Barcelona, shpallën një emergjencë thatësire. Rezervuarët që u shërbenin 6 milionë njerëzve ishin në më pak se 16% të kapacitetit të tyre, një nivel i ulët historik që mbolli alarm tek vendasit.
Hera e fundit që figura e Krishtit të Shenjtë, që përshkruan Jezusin në kryq, ishte larguar nga kapela e Sant Miquel për të ndihmuar në luftimin e thatësirës ishte në vitin 1945.
