Parlamenti Evropian ka zgjatur pezullimin e të gjitha tarifave dhe kuotave për importet e ushqimit bujqësor ukrainas në BE deri në qershor 2025.
Vendimi është në përputhje me një propozim të Komisionit Evropian në janar për të hequr tarifat për prodhimet bujqësore të Ukrainës deri në qershor 2025 me një “frenim urgjent” për shpendët, vezët dhe sheqerin.
Kjo do nënkuptonte se tarifat mund të rivendosen nëse flukset hyrëse tejkalojnë nivelet mesatare të 2022 dhe 2023.
Ligjvënësit evropianë kanë zgjeruar gjithashtu kufijtë e importit për tërshërën, misrin, drithërat dhe mjaltin.
Marrëveshja kërkon gjithashtu që Komisioni Evropian “të ndërmarrë veprime nëse ka një rritje të importeve ukrainase të grurit”.
Vendimi, megjithatë, kundërshtoi një shtysë të udhëhequr nga Polonia që kërkonte kufizime më të ashpra ndaj grurit të Ukrainës dhe importeve të tjera bujqësore.
Varshava bllokoi në mënyrë të njëanshme produktet ushqimore ukrainase nga tregjet e saj vitin e kaluar në një përpjekje për të adresuar problemet e krijuara nga vendimi i BE-së për të hapur kufijtë e saj për importet e produkteve ukrainase.
Në vitin 2022, BE-ja pezulloi tarifat dhe kuotat për prodhimet bujqësore të Ukrainës për të mundësuar dërgimin e grurit nga Ukraina në tregjet globale.
Megjithatë, një fluks masiv i produkteve bujqësore të lira nga vendi i goditur përmbyti vendet e Evropës Lindore. Importet e grurit nga Ukraina kanë qenë në qendër të protestave të fermerëve që kanë përfshirë BE-në muajt e fundit.
Muajin e kaluar, prodhuesit e bujqësisë i kërkuan Parlamentit Evropian të kufizojë masat e tregtisë së lirë, duke thënë se ato rrezikojnë ekonomitë e bllokut dhe prishin tregun.
