Një koktej molotovi u hodh në një KK Super Mart, një nga zinxhirët më të mëdhenj të dyqaneve të Malajzisë, në një qytet në lindje të vendit të shtunën, sipas policisë.
Drejtuesit më të lartë të kompanisë janë akuzuar për lëndim të ndjenjave fetare, pasi dyqanet shisnin çorape me “Allah”, fjalën arabe për Zotin, të shtypura në to.
Dy të tretat e popullsisë prej 34 milionësh të vendit janë myslimanë dhe në Islam, lidhja e këmbëve me Zotin konsiderohet shumë fyese. Fotot e çorapeve të diskutueshme tërhoqën zemërim të gjerë në internet gjatë javëve të kaluara, duke përkuar edhe me muajin e shenjtë të Ramazanit.
KK Super Mart, që është zinxhiri i dytë më i madh i dyqaneve të Malajzisë, thuhet se gjeti 14 palë çorape me “Allah” të shtypur në to, në tre vendndodhje të 881 pikave të tij.
Sulmi i së shtunës në një nga dyqanet e saj ndodhi në qytetin Kuantan. Policia tha se pajisja ndezëse shkaktoi një zjarr të vogël në hyrje të dyqanit dhe askush nuk u lëndua, sipas Reuters. Shefi i policisë së qytetit, Wan Mohamad Zahari Wan Busu, tha për agjencinë e lajmeve se ai beson se sulmi mund të lidhet me çorapët, “por ne jemi ende duke hetuar”.
Një tjetër sulm ndodhi të martën e kaluar, kur një shishe e mbushur me benzinë u hodh në një KK Super Mart në shtetin Perak, 100 kilometra në veri të kryeqytetit Kuala Lumpur, sipas medias shtetërore Bernama. Pajisja në fjalë dështoi të shpërthejë dhe nuk pati të lënduar, raportoi gazeta lokale China Press.
Të martën e kaluar, shefi i kompanisë Chai Kee Kan, i cili është kinez etnik, dhe gruaja e tij Low Siew Mui, drejtoreshë e kompanisë, u akuzuan se kishin “qëllim për të lënduar ndjenjat fetare”. Tre përfaqësues të furnizuesit Xin Jian Chang u akuzuan gjithashtu. Të gjithë janë deklaruar të pafajshëm. Nëse dënohen, ata mund të përballen me një vit burg dhe gjobë, ose mund të marrin vetëm një gjobë. Seanca është caktuar për në fund të muajit prill.
KK Super Mart ka kërkuar falje për incidentin, duke thënë se e merr çështjen “seriozisht” dhe ka ndaluar shitjen e produktit dhe se ka paditur edhe furnizuesin. Sipas gazetës Star, KK Super Mart ka vënë një shënim faljeje në dyqanet e saj në gjithë vendin.
Mbreti i ri i Malajzisë, Sulltan Ibrahim Sulltan Iskandar, në një qortim të rrallë mbretëror, ka bërë thirrje për veprime ‘të rrepta’ kundër atyre që janë shpallur fajtorë, “qoftë ky incident i qëllimshëm apo jo, pavarësisht nëse çorapet janë importuar apo prodhuar në fabrikat lokale”.
