Qytetarë nga Australia, Britania dhe Polonia ishin në mesin e shtatë personave që punonin për OJQ-në Kuzhina Qendrore Botërore (WCK), të cilët u vranë në një sulm ajror izraelit në Gazën qendrore të hënën, sipas organizatës.
Punonjësit, të cilët përfshinin gjithashtu palestinezë dhe një person me shtetësi të dyfishtë të Shteteve të Bashkuara dhe Kanadasë, po udhëtonin me dy makina të blinduara të zbukuruara me logon e WCK-së dhe një automjet tjetër, shkruan Reuters.
Pavarësisht bashkërendimit të lëvizjeve me Forcën e Mbrojtjes izraelite, kolona u godit ndërsa po dilte nga magazina e saj në Deir al-Balah, pasi shkarkoi më shumë se 100 ton ndihma ushqimore humanitare të sjellë në Gaza nga deti, tha WCK-ja.
“Ky nuk është vetëm një sulm kundër WCK-së, ky është një sulm ndaj organizatave humanitare që shfaqen në situatat më të rënda ku ushqimi përdoret si armë lufte,” tha Erin Gore, shefi ekzekutiv i World Central Kitchen.
“Kjo është e pafalshme”.
Ushtria izraelite tha se po bënte një rishikim të plotë në nivelet më të larta për të kuptuar rrethanat e asaj që e quajti një incident tragjik.
“IDF bën përpjekje të gjera për të mundësuar dërgimin e sigurt të ndihmave humanitare dhe ka punuar ngushtë me WCK-në në përpjekjet e tyre jetike për të ofruar ushqim dhe ndihmë humanitare për popullin e Gazës,” tha ushtria.
Në një deklaratë, grupi islamik Hamas tha se sulmi kishte për qëllim terrorizimin e punonjësve të agjencive ndërkombëtare humanitare, duke i penguar ata nga misionet e tyre.
