Shtetet e Bashkuara nuk kanë asnjë provë se Izraeli po kryen gjenocid në Gaza ndërsa po lufton kundër Hamasit, ka thënë Sekretari amerikan i Mbrojtjes, Lloyd Austin.
Izraeli i shpalli luftë Hamasit tetorin e kaluar pas një sulmi të papritur dhe vdekjeprurës ndërkufitar të organizuar nga grupi militant, në të cilin të paktën 1200 njerëz u vranë dhe më shumë se 200 u morën peng. Bombardimet dhe operacionet tokësore të mëvonshme izraelite në Gaza kanë vrarë të paktën 33,000 njerëz, sipas Ministrisë së Shëndetësisë në enklavë.
Austin, i cili po mbante fjalën e hapjes për kërkesën e Pentagonit për buxhetin e vitit 2025, u ndërpre dy herë nga protestuesit anti-izraelitë të cilët hynë në sallën e dëgjimit në Capitol Hill, duke kërkuar që SHBA-ja të “ndalojë financimin e Izraelit”.
I pyetur nga senatori republikan Tom Cotton nëse ishte dakord me pretendimet e protestuesve për gjenocid, Austin tha se nuk ishte dakord.
“Ne nuk kemi asnjë provë të gjenocidit,” u përgjigj Austin. “Unë do t’i kujtoja të gjithëve se ajo që ndodhi më 7 tetor ishte absolutisht e tmerrshme.”
Muajin e kaluar, raportuesja speciale e Këshillit të të Drejtave të Njeriut të OKB-së, Francesca Albanese, përfundoi në një raport se ka, në fakt, “baza të arsyeshme për të besuar se pragu që tregon kryerjen e gjenocidit të Izraelit është përmbushur”.
