I hollë, me një fytyrë djaloshare dhe vathë në të dy veshët, 23-vjeçari Isayah Turner nuk duket si një mbështetës stereotip i Trump, i cili zakonisht priret të jetë në moshë të mesme ose më të vjetër.
Megjithatë, Turner udhëtoi me makinë dy orë nga shtëpia e tij jashtë Milwaukee të martën e fundit për të parë kandidatin republikan presidencial Donald Trump në një tubim në Green Bay, Wisconsin. Ai ishte një nga shumë votuesit e rinj atje që disa sondazhe sugjerojnë se mund të jetë një rritje e rëndësishme për bazën e votuesve të Donald Trump-it në zgjedhjet e ardhshme.
Për presidentin aktual demokrat Joe Biden, i cili fitoi me shumicë dërrmuese votën e të rinjve në vitin 2020, një gërryerje e mbështetjes së tij midis votuesve të rinj mund të zbehë shpresat e tij për një mandat të dytë.
Turner, i cili drejton një biznes për mbarështimin e qenve me nënën e tij, votoi për Trump në vitin 2020. Ai mbështet qëndrimin pro-kërkimit për naftë nga Trump, kundërshtimin e tij ndaj kontrollit të armëve pasi Turner zotëron disa armë zjarri dhe premtimin e tij për të goditur emigracionin e paligjshëm.
“Nuk mund të mendoj për një gjë që të ketë bërë Trump dhe që më ketë shqetësuar kur ishte në detyrë. Dhe tani me Biden në detyrë ka gjëra të panumërta me të cilat nuk jam dakord,” tha Turner për Reuters.
“Shumë nga miqtë e mi janë në të njëjtën varkë me mua.”
Një sondazh i Reuters/Ipsos në mars tregoi se amerikanët e moshës 18-29 vjeç favorizonin Biden me vetëm 3 pikë përqindje më shumë se Trump-in – 29% deri në 26% – me pjesën tjetër që favorizonte një kandidat tjetër ose që ishin të pasigurt se për cilin do votonin.
Nëse Trump, 77 vjeç, qëndron pranë Biden-it, 81 vjeç, në këtë demografi votuesish deri në ditën e zgjedhjeve më 5 nëntor, do ishte një fitim i madh në krahasim me vitin 2020, kur Biden fitoi votën e të rinjve me 24 pikë.
Shqetësimet për moshën e Biden-it dhe mbështetjen e tij ndaj Izraelit në luftën kundër Hamasit në Gaza kanë nxitur gërryerjen e mbështetjes së tij në mesin e votuesve të rinj në një kohë që ai po humbet edhe votuesit hispanikë.
Ka gjithashtu shenja se të rinjtë po ngrohen ngadalë drejt Partisë Republikane, pavarësisht përpjekjeve të Biden-it për t’i mbajtur ata në krah duke u përpjekur të anulojë borxhin e studentëve, të zgjerojë strehimin e përballueshëm dhe të ndryshojë frenimin e të drejtave të abortit.
Përqindja e amerikanëve ndërmjet moshës 18-29 vjeç që identifikohen si republikanë është rritur, nga 24% në 2016 në 26% në 2020 dhe 28% deri tani këtë vit, tregon sondazhi i Reuters/Ipsos.
Pavarësisht motit të ashpër me borë e stuhi, rreth 3,000 mbështetës të Trump u rreshtuan jashtë një qendre konventash në Green Bay më 2 prill për të parë Trump. Turma kishte shumë të vjetër si zakonisht, por kishte edhe qindra të rinj.
Reuters intervistoi 20 persona nën moshën 30 vjeç për të kuptuar mbështetjen e tyre. Arsyeja më e zakonshme e dhënë për mbështetjen e ish-presidentit ishte inflacioni dhe perceptimi se ekonomia nuk po funksiononte për ta, duke nënvizuar se si rritja e çmimeve për produktet kryesore ditore është më e spikatur për disa sesa çmimet e larta të aksioneve dhe papunësia e ulët gjatë viteve të Biden-it.
“Unë fitoj ende shumë para dhe nuk mund të përballoj një shtëpi me rrogën që bëj tani,” tha Steve Ëendt, 26 vjeç, një roje sigurie në një spital aty pranë.
“Është koha për të rikthyer në detyrë një njeri që do ulë çmimet tona.”
Në të njëjtën kohë, shumica thanë se ishin dakord me rezervimin e Trump për të ndihmuar Ukrainën në luftën e saj me Rusinë, një qëndrim izolues në kundërshtim me axhendën e politikës së jashtme të Biden.
Collin Crego, 19 vjeç, një student historie, tha se fondet e shpenzuara jashtë shtetit do përdoreshin më mirë për të trajtuar çështjet e brendshme si varësia ndaj drogës.
“Nuk më pëlqen shumë ajo që po bëjmë me Ukrainën,” tha Crego.
“Kur e dëgjoj Trump duke folur, ai është shumë patriot, vë Amerikën të parën dhe kjo më pëlqen”.
Nga 20 personat e intervistuar nga Reuters, 15 cituan inflacionin ose shqetësime të tjera ekonomike për arsyen pse ata mbështesin Trump-in, ndërsa një duzinë thanë se plani i tij për të kufizuar emigracionin ishte i rëndësishëm për ta.
Të gjithë thanë se nuk shqetësoheshin nga katër çështjet penale me të cilat përballet Trump, ose ideja se përpjekjet e tij për të përmbysur zgjedhjet e 2020 e bënë atë një kërcënim për demokracinë. Njëri ishte me ngjyrë të zezë, 19 të tjerët ishin të bardhë. Tetë prej tyre do votojnë për herë të parë në zgjedhjet e nëntorit.
Caitlyn Huenink, 20 vjeç, tha se të qenit një mbështetëse e re e Trumpit mund të jetë e vështirë sepse të rinjtë me prirje majtas priren të vrenjten në pikëpamjet e saj. Megjithatë, ajo tha se kohët e fundit ka parë ndryshime në grupin e bashkëmoshatarëve të saj në Universitetin e Wisconsin.
“Ata janë më të hapur ndaj mënyrës se si unë mendoj dhe më shumë nga miqtë e mi po bëhen republikanë,” tha ajo.
Edhe pse një grup të rinjsh të gatshëm të përballojnë motin e keq për të parë Trump-in nuk janë një mostër përfaqësuese e elektoratit më të gjerë, sërish sondazhi nuk jep sinjale të mira për Biden-in. Të rinjtë votojnë më rrallë se amerikanët e moshuar, duke i bërë ata veçanërisht të vështirë për t’u parashikuar.
Për më tepër, disa sondazhe të opinionit tregojnë se Biden po mban avantazhin e tij të rëndësishëm me të rinjtë.
Një sondazh i Economist/YouGov i kryer javën e kaluar tregoi se 51% e votuesve nën 30 vjeç zgjedhin Biden, kundrejt 32% për Trump, ndërsa Sondazhi Rinor i Harvardit, i publikuar të enjten, e vendosi epërsinë e Biden ndaj Trump midis votuesve të rinj të mundshëm në 19 pikë.
“Donald Trump nuk po e fiton votën e të rinjve”, tha për Reuters John Della Volpe, drejtor përgjegjës për sondazhin e Harvardit.
Fushata e Biden-it nuk ka reaguar ende. Në mars ajo nisi një blerje reklamash prej 30 milionë dollarësh në platformat dixhitale dhe njoftoi një projekt për të arritur studentët dhe për të rekrutuar vullnetarë në shkollat e mesme dhe në kampuset e kolegjeve. Ajo po punon për të informuar të rinjtë për investimet e administratës në energjinë e gjelbër dhe përpjekjet për të mbrojtur qasjen ndaj abortit.
“Kjo është arsyeja pse fushata po punon pa u lodhur për të fituar votat e votuesve të rinj duke investuar më herët se kurrë dhe duke shfrytëzuar çdo mundësi për t’u lidhur me votuesit e rinj,” tha Eve Levenson, drejtoresha e angazhimit të të rinjve të fushatës.
Sondazhi i fundit është megjithatë një flamur i kuq për Biden. I kryer në mars, ai e tregoi Trump-in 2 pikë përpara midis votuesve të Millennial dhe Gen-Z, me 61% të moshave 18-29 vjeç që thonë se nuk e miratojnë punën që Biden po bën si president.
Fushata e Trump i sheh të rinjtë si një demografi për përfitime të mundshme në 2024, u tha gazetarëve një këshilltar fushate muajin e kaluar. Ai tha se ekonomia dhe konfliktet jashtë shtetit – Trump shpesh pretendon se sulmi i Rusisë ndaj Ukrainës nuk do kishte ndodhur në kohën e tij – ishin temat kryesore si mesazhe ndaj këtij grupi.
“Ashtu si shumë amerikanë, të rinjtë nuk mund të përballojnë qiranë, gazin ose sendet ushqimore dhe ata po luftojnë për të blerë një shtëpi sepse pagat janë ulur ndjeshëm,” tha Anna Kelly, një zëdhënëse e Komitetit Kombëtar Republikan.
Kelly gjithashtu vuri në dukje një gjetje në sondazhin e Harvardit – që vetëm 9% e të rinjve amerikanë mendojnë se SHBA është në rrugën e duhur – si provë se disa po i drejtoheshin Trumpit.
Mes votuesve të rinj, Trump duket se po ia del më mirë me meshkujt. Sondazhi i Harvardit vendosi epërsinë e Biden mes të rinjve në vetëm 6 pikë përqindjeje, 20 pikë më pak nga 4 vjet më parë. Deficiti i Trump me gratë ishte 33 pikë, kryesisht i pandryshuar.
Della Volpe thotë se hendeku gjinor ka të ngjarë të pasqyrojë disa faktorë. Njëra është se të rinjtë mendojnë se po humbasin të drejtën për të folur sinqerisht për shkak të pikëpamjeve progresive që ata besojnë se u imponohen për korrektësinë politike dhe maskulinitetin toksik. Këto shqetësime përforcohen nga Trump dhe podkasterët si Jordan Peterson, i njohur me të rinjtë.
Trump ka marrë pjesë në disa ngjarje të Kampionatit Ultimate Fighting këtë cikël zgjedhor, të cilat favorizohen nga të rinjtë. Ai u shfaq gjithashtu në një konventë atletesh në Filadelfia, ku nxori në shitje “Atletet e tij të arta” “Never Surrender High-Tops”.
Ishte një lloj ndalimi i fushatës që synonte të rezononte me votuesit si Turner, një adhurues i atleteve që kishte veshur një palë Nike prej 400 dollarësh kur Reuters kaloi një pasdite me të në biznesin e tij të mbarështimit të qenve dy ditë pas tubimit.
Turner foli për sfidat e drejtimit të një biznesi. Ai tha se benzina ishte një shpenzim i madh për të pasi ai shpesh shkon me makinë tek blegtorët disa orë larg.
Turner tha se ishte nëna e tij që mbështet Trump-in dhe që ka qenë një ish-mbështetëse e Presidentit Barack Obama, ajo që e bëri atë të interesohej për politikën.
Ashtu si të rinjtë e tjerë që Reuters takoi në tubim, Turner tha se ishte mënyra e Trump për të folur pa u kujdesur për pasojat politike që e bënë atë tërheqës. Ai tha se disa nga retorikat dehumanizuese të Trump-it e shqetësojnë atë, por ai beson – siç ka thënë Trump – se Biden është kërcënimi i vërtetë për Amerikën.
“Disa prej tyre janë ekstreme,” tha Turner për fjalimin e Trump. “Por në të njëjtën kohë, nëse kjo do të thotë se vendi do jetë fenomenalisht më i mirë dhe do të jetë ende një vend i lirë, unë mund të përballoj që ndjenjat e mia të lëndohen në këmbim të kësaj.”
VINI RE: Ky material është pronësi intelektuale e Reuters
Përgatiti për Hashtag.al, Klodian Manjani
