Një sulm i armatosur në një xhami shiite në provincën Herat të Afganistanit të hënën në mbrëmje la të paktën shtatë besimtarë të vdekur, thonë mediat lokale.
Sipas IRNA duke cituar një kanal afgan të lajmeve, burra të panjohur të armatosur sulmuan xhaminë Imam Zaman në qytetin Andisheh të distriktit Gozrah në Herat, që ndodhet në Afganistanin perëndimor.
Të paktën shtatë besimtarë, duke përfshirë prijësin e xhamisë, 2 gra dhe një fëmijë u martirizuan dhe një numër i të tjerëve u plagosën si pasojë e sulmit që ndodhi gjatë namazit të akshamit (mes akshamit dhe jacisë).
Deri më tani nuk janë publikuar detaje të tjera. Qeveria e përkohshme talebane gjithashtu nuk ka komentuar sulmin.
Gjithashtu, asnjë individ apo grup nuk ka marrë ende përgjegjësinë për incidentin.
Ndërkohë, ambasada e Iranit në Kabul në një deklaratë dënoi ashpër një “sulm terrorist” në një xhami shiite në provincën Herat.
Deklarata që pasoi sulmin e armatosur tha se Irani kërkon të identifikojë dhe ndëshkojë ata që janë përgjegjës për “këtë krim”. Ai shtoi se Irani është i përgatitur të forcojë bashkëpunimin me talebanët në përpjekjet kundër terrorizmit.
