Donald Trump po shikon planet për t’i shtyrë anëtarët e NATO-s që të rrisin shpenzimet e mbrojtjes nga 2% në 3% të PBB-së, nëse ai rizgjedhet në nëntor, raportoi të premten The Telegraph, duke cituar burime të afërta me ish-presidentin amerikan.
Trump thuhet se ka konsideruar rritjen prej disa kohësh, por u bind më tej nga argumentet e presidentit polak Andrzej Duda, tha për mediat një burim i afërt me ish-presidentin. Të dy u takuan për bisedime në Nju Jork muajin e kaluar.
Duda ka bërë thirrje në mënyrë të përsëritur për një rritje të shpenzimeve të mbrojtjes në të gjithë aleancën, duke argumentuar se 3% nevojiten për t’u mbrojtur kundër “kërcënimeve në rritje”, përfshirë atë nga Rusia.
Takimi i Trump me Dudën gjithashtu thuhet se luajti një rol në bindjen e tij për të hequr kundërshtimin e tij ndaj një pakete ndihme të vonuar prej kohësh, e cila përfshinte 60 miliardë dollarë për Kievin.
Në shkurt, Trump u kritikua nga Shtëpia e Bardhë dhe zyrtarë të lartë perëndimorë për sugjerimin se ai nuk do mbronte aleatët e NATO-s të cilët nuk kishin shpenzuar mjaftueshëm për mbrojtjen dhe madje do nxiste Rusinë t’i sulmonte ata. Në mars, agjencitë e inteligjencës amerikane paralajmëruan se Amerika po përballet me një “rend të brishtë botëror” mes kërcënimeve ruse dhe kineze.
32 anëtarët e NATO-s kanë rënë dakord për një objektiv për të shpenzuar të paktën 2% të PBB-së për mbrojtjen. Vlerësimet e NATO-s të vitit të kaluar kanë treguar se vetëm 11 vende po shpenzojnë kaq shumë, duke përfshirë kontribuesin e saj më të madh, SHBA-në, si dhe Mbretërinë e Bashkuar, Poloninë, Estoninë, Lituaninë, Greqinë, Hungarinë, Finlandën, Letoninë, Sllovakinë dhe Danimarkën.
Belgjika dhe Spanja shpenzuan 1.2%, ndërsa Luksemburgu, i cili ka buxhetin më të vogël për mbrojtjen në krahasim me PBB-në e tij, shpenzoi vetëm 1%. Vetëm Polonia, SHBA dhe Greqia shpenzuan më shumë se 3%.
