Ushtria ukrainase ka njoftuar vendosjen e njësive shtesë rezervë në Kharkov, ku forcat ruse po mblidhen në qytetin që ndodhet në pjesën verilindore të vendit.
Të hënën, Departamenti i Komunikimeve Strategjike (StratCom) zbuloi në Telegram se masa synon të forcojë mbrojtjen e Ukrainës në zonë, duke shtuar se grumbullimi i forcave do vijojë “në varësi të zhvillimit të gjendjes”.
Departamenti vuri në dukje se forcat ruse po vijonin të fitonin terren në drejtimin e Kharkovit dhe kanë arritur të largojnë trupat ukrainase nga disa zona kyçe. Kjo u konfirmua edhe nga shtabi i përgjithshëm i ushtrisë të hënën, i cili pranoi se Rusia ka pasur “sukses taktik” në shtytjen e saj të fundit ofensive.
Ndërkohë, raportet e tjera të mediave kanë sugjeruar se Kievi po zhvendos gjithashtu disa nga forcat e tij nga rajone të tjera në zonë, ndërsa Rusia po afrohet me qytetin e dytë më të madh në Ukrainë.
Sipas Bloomberg, Kievi ka filluar të dislokojë më shumë trupa për të stabilizuar vijën e frontit verilindor, duke vënë në dukje se ofensiva e Rusisë ka të ngjarë të ketë shtyrë tashmë “forcat e paarmatosura ” të Ukrainës dhe mund ta shtyjë Kievin të ridislokojë trupa edhe nga fronti lindor.
Agjencia e lajmeve TASS ka raportuar gjithashtu, duke cituar një burim brenda ushtrisë ruse, se një numër i njësive ukrainase nga zona Krasnoarmeysk në Republikën Popullore të Donetsk duket se janë transferuar në veri në Kharkov.
