Agjencia e Mbikëqyrjes Policore pas hetimeve të prokurorisë ka ekzekutuar vendimin e Gjykatës për punonjësin e policisë me iniciale M.Q i cili akuzohet se nuk referonte materialet proceduriale në prokurori.
Punonjësi i policisë me gradën nënkomisar gjatë kohës që punonte në Drejtorinë e Policisë Vlorë ka rezultuar se nuk ka referuar në prokurori raste aksidentesh me pasoja të rënda duke konsumuar elementë të veprës penale “Shpërdorim detyre”.
“Agjencia e Mbikëqyrjes Policore (Rajoni Vlorë – Gjirokastër), pas një hetimi disa mujor nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Vlorë, ka ekzekutuar sot vendimin e Gjykatës, e cila ka caktuar masën e sigurimit “Pezullim i ushtrimit të një detyre a shërbimi publik” ndaj punonjësit të Policisë, Nënkomisar M.Q. Ai është aktualisht me detyrë OPGJ në Sektorin e Trafikut Urban dhe Interurban në DVP Gjirokastër.
Nga hetimet e kryera ka rezultuar se punonjësi i Policisë në kohën kur ishte me detyrë në DVP Vlorë, nuk referonte materialet proceduriale në Prokurori për raste aksidentesh me pasoja të rënda, duke konsumuar elementë të veprës penale “Shpërdorim i detyrës”.
Vijojnë hetimet për raste të tjera të veprimeve të paligjshme të kryera nga ky punonjës policie”-njofton AMP.
