Udhëheqësi i një tentative për grusht shteti të dielën në Republikën Demokratike të Kongos (DRC) është vrarë së bashku me 50 persona, duke përfshirë tre shtetas amerikanë të cilët janë arrestuar, tha një zëdhënës i ushtrisë së vendit të Afrikës Qendrore për Reuters.
Të shtënat me armë kanë rënë rreth orës 4 të mëngjesit në kryeqytetin Kinshasa, tha një reporter i Reuters. Burra të armatosur sulmuan presidencën në qendër të qytetit, sipas zëdhënësit Sylvain Ekenge.
Një tjetër sulm ndodhi në shtëpinë e afërt të Vital Kamerhe, një anëtar i parlamentit që pritet të bëhet kryetar, tha zëdhënësi i Kamerhe, Michel Moto Muhima dhe ambasadori japonez në postimet në Twitter/X, përcjell The Guardian.
Ekenge evidentoi Christian Malanga, një politikan kongolez me bazë në SHBA, si udhëheqësin e tentativës për grusht shtet.
“Malanga u neutralizua përfundimisht gjatë sulmit në Palais de la Nation, edhe një person i quajtur Aboubacar u neutralizua gjatë sulmit në rezidencën e Vital Kamarhe, rreth 50 të tjerë duke përfshirë tre shtetas amerikanë – u arrestuan dhe aktualisht janë duke u marrë në pyetje nga shërbimet e specializuara të forcave të armatosura”, tha Ekenge për Reuters.
Ai tha se Malanga tentoi për herë të parë dhe ndërpreu një grusht shteti në vitin 2017 dhe se një nga shtetasit amerikanë të arrestuar ishte djali i Malangas.
Një faqe në Facebook që duket se i përkiste Malanga-s postoi një video të drejtpërdrejtë të asaj që dukej të ishte sulmi.
“Ne, militantët, jemi të lodhur. Ne nuk mund të zvarritemi me [Presidentin Félix] Tshisekedi dhe Kamerhe, ata kanë bërë shumë marrëzi në këtë vend,“-tha Malanga në Lingala në video, e cila nuk është verifikuar në mënyrë të pavarur nga Reuters.
Ambasadorja amerikane, Lucy Tamlyn, tha në një postim në mediat sociale se ishte “shumë e shqetësuar” nga raportimet se shtetasit amerikanë dyshohet se ishin përfshirë në ngjarje.
“Ju lutemi të jeni të sigurt se ne do të bashkëpunojmë me autoritetet e DRC në masën më të plotë, ndërsa ato hetojnë këto akte kriminale dhe mbajnë përgjegjës çdo shtetas amerikan të përfshirë në akte kriminale,” tha ajo.
Ambasada e SHBA-së kishte lëshuar më herët një alarm sigurie për “aktivitet të vazhdueshëm nga elementët e sigurisë së DRC” dhe raporte për të shtëna me armë në zonë.
Misioni i stabilizimit i Kombeve të Bashkuara në DRC tha se shefi i tij, Bintou Keita, dënoi incidentet në termat më të fortë dhe ofroi mbështetjen e saj për autoritetet kongoleze në një postim në X.
Tshisekedi u rizgjodh për një mandat të dytë si president në dhjetor, por ende nuk ka emëruar një qeveri, gjashtë javë pas emërimit të një kryeministri.
Kamerhe ishte një kandidat për kryetar parlamenti në një zgjedhje që ishte caktuar për të shtunën, por u vonua nga Tshisekedi.
