24 orë e 26 minuta, pa u ndalur për të fjetur. Phunjo Lama i Nepalit sapo ka thyer rekordin botëror për ngjitjen më të shpejtë të malit Everest nga një grua.
Udhëtimi i saj nga kampi bazë i Everestit deri në majë zgjati 14 orë e 31 minuta, pastaj zbritja nga Everesti ishte 9 orë e 18 minuta të tjera. Ajo u largua nga kampi bazë në orën 15:52 më 23 maj, duke mbërritur në majën e botës në orën 6:23 të mëngjesit të nesërm.
Për shkak të sezonit të kufizuar të ngjitjes dhe kushteve sfiduese në malin Everest, hapësira për të arritur në majën e malit është e vogël. Çdo vit, fotot tregojnë radhë të gjata alpinistësh që presin mundësinë e tyre për të arritur në majë, me “pengesa” që ndonjëherë zgjasin me orë të tëra.
Ngjitja gjatë natës e ndihmoi Lamën të anashkalonte turmat e mëdha, thotë ajo për CNN. Ajo vlerëson se midis 21 dhe 22 majit kishte 6700 njerëz midis kampeve 2 dhe 4. Në mëngjesin e datës 24 maj, ajo ishte pas “60 ose 70” njerëzve.
Rekordet për ngjitjen më të shpejtë janë vendosur nga kampi bazë për shkak të nevojës për t’u përshtatur në lartësinë ekstreme. Lama kaloi tre javë atje përpara shtytjes së saj drejt majës. Mali Everest është 8,849 metra i lartë.
Sipas Rekordeve Botërore Guinness, që shikon kohën që duhet për të bërë udhëtimin e kthimit nga kampi bazë, Lama vendosi rekordin e saj të parë të Everestit në vitin 2018, me një kohë prej 39 orë e gjashtë minuta. Ky rekord u thye në vitin 2021 nga Ada Tsang nga Hong Kongu në 25 orë e 50 minuta. Këtë vit ishte ngjitja e dytë e Lamës në Everest.
Aktualisht, rekordi për ngjitjen më të shpejtë nga një alpinist mashkull është 10 orë e 56 minuta, i vendosur nga nepalezi Lhakpa Gelu Sherpa në vitin 2003.
Pavarësisht arritjes, Lama thotë se nuk është e fiksuar pas një rekordi apo njohjeje nga Guinness. Ajo thotë se dikush tjetër ka kontaktuar kompaninë e mbajtjes së të dhënave në vitin 2018 në emër të saj.
Edhe pse nuk e dinte kurrë që alpinizmi ishte një profesion, Lama e jetoi pjesën më të madhe të jetës në 4500-5000 metra mbi nivelin e detit. Ajo u rrit në një komunitet në luginën e largët Tsum të Nepalit.
“Malet janë sheshi i lojërave dhe shtëpia ime”, tha ajo për CNN.
“Një mal nuk e dallon kurrë nëse je grua a burrë. Kjo është arsyeja pse më pëlqejnë malet, sepse një mal është gjithmonë i barabartë.”
Lama tashmë ka arritur majën Denali të Alaskës, mali më i lartë në Amerikën e Veriut dhe shpreson të ngjitet në K2 në Pakistan, majën e dytë më të lartë në botë.
Sezoni i ngjitjeve 2024 ka sjellë disa ndryshime në majën më të lartë në botë.
