Njerëzit që kryejnë krime seksuale kundër fëmijëve në Luiziana mund të detyrohen t’i nënshtrohen kastrimit kirurgjik sipas legjislacionit të miratuar, një masë që do jetë e para e këtij lloji në Shtetet e Bashkuara nëse Guvernatori e nënshkruan atë në ligj.
Projektligji që u miratua me shumicë dërrmuese nga legjislatura e shtetit të hënën, do t’i lejojë gjyqtarët të urdhërojnë kastrim kirurgjik për të pandehurit e dënuar për disa krime seksuale të rënduara, si përdhunimi, ndaj fëmijëve nën moshën 13 vjeç. Tani ai do shkojë për firmë te Guvernatori Jeff Landry, një republikan.
Zyra e Landry nuk u përgjigj menjëherë kur u pyet nëse ai synon të nënshkruajë legjislacionin.
Një pjesë e vogël e shteteve, përfshirë Luizianën, Kaliforninë dhe Teksasin, kanë tashmë ligje që u japin gjyqtarëve fuqinë për të urdhëruar tredhjen kimike në disa raste, një masë më pak ndërhyrëse që përfshin marrjen e ilaçeve që bllokojnë hormonet.
Por Luiziana do ishte shteti i parë që do lejonte gjyqtarët të detyrojnë tredhjen kirurgjikale si dënim, sipas Shoqatës Kombëtare për Ligjet e Veprimeve Racionale Seksuale (NARSOL), një grup mbrojtës që kundërshtoi projektligjin.
Projektligji kërkon një përcaktim nga një ekspert mjekësor i caktuar nga gjykata që një i pandehur është një “kandidat i përshtatshëm për kirurgji” përpara se një gjyqtar të mund të urdhërojë procedurën.
Kundërshtarët argumentojnë se dënimi është mizor dhe vërejnë se tredhja kirurgjikale, ndryshe nga tredhja kimike, është e pakthyeshme.
“Është, në rastin më të mirë, joefektive dhe në rastin më të keq, barbare,” tha në një deklaratë Sandy Rozek, një zëdhënëse e NARSOL.
Ndërsa legjislacioni tërhoqi pjesën më të madhe të mbështetjes nga republikanët, të cilët mbizotërojnë legjislaturën e Luizianës, ai u prezantua nga Senatorja Regina Barroë, një demokrate.
“Dua të sigurohem që fëmijët tanë të jenë të sigurt,” tha ajo në një seancë dëgjimore muajin e kaluar.
