Demonstrata të shumta janë zhvilluar në Paris dhe qytete anembanë Francës të shtunën për të protestuar kundër partisë së djathtë Tubimi Kombëtar (RN) përpara zgjedhjeve të ardhshme për parlamentin francez.
Pas rritjes së RN në zgjedhjet për Parlamentin Evropian të së dielës së kaluar, policia tha se 350,000 njerëz pritej të marshonin dhe 21,000 oficerë policie ishin mobilizuar pasi sindikatat e punës, grupet studentore dhe grupet e të drejtave të njeriut bënë thirrje për mitingje për të kundërshtuar partinë antiemigracion dhe euroskeptike.
Të paktën 150 marshime priten në qytete duke përfshirë Marsejën, Tuluzën, Lionin dhe Lilën.
Në Paris, ku pritej të dilnin deri në 100,000 njerëz, një marshim u nis në mesditë nga Place de La Republique, në lindje, duke kaluar nëpër sheshin Bastille.
Duke folur në Place de La Republique, udhëheqësja e sindikatës CGT e së majtës Sophie Binet u tha gazetarëve: “Ne po marshojmë sepse jemi jashtëzakonisht të shqetësuar pasi kreu i RN Jordan Bardella mund të bëhet Kryeministri i ardhshëm. Ne duam ta parandalojmë këtë fatkeqësi.”
Presidenti Emmanuel Macron thirri zgjedhjet e parakohshme legjislative, që do të mbahen në dy raunde më 30 qershor dhe 7 korrik, pasi aleanca e tij centriste u mposht nga RN në votimin e Parlamentit Evropian të së dielës së kaluar.
Një seri e parë sondazhesh kanë parashikuar se RN mund të fitojë zgjedhjet dhe të jetë në gjendje të formojë qeverinë e ardhshme.
Një sondazh i kryer për revistën Le Point të publikuar të premten parashikonte se RN do kryesonte në raundin e parë të zgjedhjeve parlamentare me 29.5% të votave, pak përpara Frontit Popullor me 28.5%.
Kampi qendror i Macron ishte në 18%.
