Gjatë një takimi me socialistët e Rrogozhinës, ku shprehu mirënjohjen për kontributin e tyre në parti, drejtuesi politik i PS për Qarkun e Tiranës, Erion Veliaj, theksoi se të ishe socialist në vitet ’90 ishte shumë e vështirë. Ai gjithashtu komentoi sjelljet e Presidentit të PL-së, Ilir Meta, duke thënë se ai ka humbur lidhjen me realitetin.
“Ne kemi pasur President Republike dikë që futej në zyra bashkie dhe zihej e therej me policët bashkiakë. Një karikaturë totale e mënyrës si degradon njeriu kur nuk e kupton se ka humbur lidhjen me njerëzit dhe realitetin”, tha ai.
Veliaj vlerësoi socialistët për kontributin e dhënë ndër vite dhe përkushtimin e tyre për të sjellë një transformim total të Shqipërisë.
“Shumë prej jush e mbani mend sa e vështirë ishte të ishe socialist në 21 janar, kur vriteshin me plumba në mish socialistët. Kush është i brezit të 94-ës, të referendumit të 96-ës, të 97-98-ës, e mbajnë mend se sa gjak socialistësh është derdhur në të gjitha sheshet e Shqipërisë. Sot është pak më kollaj.
Por, meqë sot është më kollaj, na takon ta dimë historinë, të përkulemi me respekt dhe falënderim për ata që, për 33 vite të vështira, mbajtën forcën, familjen tonë të bashkuar, idealiste dhe të përkushtuar me misionin për të sjellë një transformim total të Shqipërisë”, u shpreh ai.
