Ministri i Jashtëm izraelit, Israel Katz, është zotuar të nisë një përgjigje “disproporcionale” pasi Hezbollahu dyshohet se vrau dhjetë persona në një sulm me raketa në një fushë futbolli në Lartësitë Golan. Incidenti e ka sjellë Izraelin në prag të “luftës gjithëpërfshirëse” me grupin, ka paralajmëruar Katz.
Shumica e të vdekurve ishin fëmijë dhe më shumë se një duzinë u plagosën nga sulmi në qytetin Majdal Shams të shtunën, sipas shërbimit të ambulancës së Izraelit Magen David Adom. Forcat e Mbrojtjes të Izraelit (IDF) fajësuan për sulmin “grupin terrorist Hezbollah”.
“Nuk ka dyshim se Hezbollahu i ka kaluar të gjitha vijat e kuqe”, tha Katz për Channel 12 News të Izraelit. “Ne po përballemi me një luftë të plotë me grupin”, vijoi ai, duke shtuar se Izraeli “do përgjigjet në mënyrë disproporcionale”.
Katz tha se ai “nuk do hynte në hollësi” se si do dukej një përgjigje e tillë, por pretendoi se Izraeli ka “mbështetjen e plotë” të SHBA-së dhe Evropës për të përshkallëzuar kundër Hezbollahut.
Lëvizja politike e fuqishme e mbështetur nga Irani dhe forca paraushtarake hynë në konfliktin Izrael-Hamas tetorin e kaluar. Luftëtarët e saj deri më tani kanë zhvilluar një fushatë të kufizuar të sulmeve me dron dhe raketa në veri të Izraelit, për të cilën udhëheqësi i Hezbollahut, Hassan Nasrallah tha në nëntor, kishte për qëllim të mbante të bllokuara forcat izraelite pranë kufirit libanez për të parandaluar vendosjen e tyre në Gaza.
Zyrtarët në Uashington kanë paralajmëruar si Hezbollahun ashtu edhe Izraelin kundër ndezjes së një lufte në shkallë të gjerë, e cila potencialisht mund të përshkallëzohet në një konflikt të madh që përfshin SHBA-në dhe Iranin.
