Kryetari i Partisë Demokratike Sali Berisha ka reaguar ditën e sotme para mbështetësve të tij në lidhje me ndryshimet e lajmëruara nga kreu i qeverisë Edi Rama ditën e sotme.
Berisha u shpreh se në Partinë Socialiste nuk ekziston asnjë forum tjetër “përveç njishit”, ndërsa shtoi se “të gjithë të tjerët janë zero me bisht pas tij.”
Berisha e cilësoi kongresin si një shfaqje të shëmtuar të kontrollit të Ramës mbi partinë, ku çdo anëtar tjetër është vetëm një “zero me bisht pas tij.” Ai e kritikoi gjithashtu zgjedhjen e Zilie Palit si kryetare të Kuvendit, duke e quajtur atë figurën më fantazmagorike të politikës shqiptare në 32 vitet e fundit.
Në fjalimin e tij, Berisha e përshkroi kryeministrin Rama si një udhëheqës që ka shpallur vetëm disa individë të besuar dhe që ka lënë jashtë ata që nuk e mbrojtën në sulmet e opozitës. Ai akuzoi Ramën se përjashtoi dhe dënoi ata që nuk përmbushën kërkesat e tij, duke përdorur terma të ashpër për ta.
Fjala e plotë e Berishës:
Mirëmbrëma dhe përshëndetje më të përzemërta, mirënjohjen të pakufishme ndaj jush, qëndrestarëve dhe qendrestareve të kauzës së drejtë të shqiptarëve.
Të dashur miq!
Sot para shqiptarëve doli me të gjithë lakuriqësinë e tij të shëmtuar, kongresi i partisë me katër emra, i cili në dallim nga çdo kongres tjetër në 83 vite, sanksionoi se ajo parti, në atë parti nuk ekziston asnjë forum tjetër, asnjë anëtar forumesh të tjera, ekziston njishi, njishi dhe të gjithë të tjerët janë zero me bisht pas tij.
Në këtë kontekst, mund ta vlerësojmë kongresin si aktin politik të metamorfozës së rilindjes, metamorfozës së plotë të rilindjes.
Miqtë e mi!
Parë në çdo aspekt, ky kongres ka fytyra njërën më të shëmtuar se tjetrën. Ai në fakt u mbyll edhe si kongresi i spiropalizimit të rilindjes.
Figura më fantazmagorike në 32 vite të politikës shqiptare, Zilie Pali, apo Zilie Gjoka u zgjodh kryetare e kuvendit të Shqipërisë.
Por dua të jemi të sinqertë dhe gjërat duhet ti shohim jo me pasion të madh politik se i kemi kundërshtarë, por fjalët që tha ai për deputetët e tij, ishin një kopje e zbutur e fjalëve të mia për ata deputetë.
Hajdutë, interesaxhi, antipopullor, dhe çdo epitet tjetër.
Sot kreu i narkosit gjeti të lavdërojë vetëm Vullnet Sinën se i ka dhënë dorëheqjen me probleme madhore me fshatarët e Gjormit dhe Labërisë, seç bën atje me gurore, ujëra etj.
Kurse të tjerët i quajti minj portalesh, intrigantë, gjuhë nepërkash që ju mbetet jashtë.
I quajti dhe çfarë nuk i quajti or miq, dhe e dini se pse, se ata jo se nuk kanë mëkate, se janë mëkatarë të mëdhenj, por mëkati i tyre më i madh për Edi Ramën është se, ata nuk e mbrojtën Ramën dhe Olsin kur opozita i bëri radiografinë në parlament.
