Ushtria izraelite tha të enjten se vrau pesë militantë në Bregun Perëndimor, ndërsa kryente operacione kundër terrorizmit për të dytën ditë radhas. Forcat izraelite i vranë militantët brenda një xhamie ku ata ishin fshehur në qytetin e Tulkaremit, tha ushtria.
Forcat Izraelite të Mbrojtjes identifikuan një nga militantët si Mohammed Jaber, një komandant i grupit Xhihadi Islamik dhe thanë se ai kishte qenë i përfshirë në sulme të shumta ndaj izraelitëve.
Forcat izraelite vranë të paktën nëntë persona të mërkurën gjatë bastisjeve dhe sulmeve ajrore në qytetin e Jeninit dhe rreth tij. Grupi militant Hamas tha se10 nga luftëtarët e tij u vranë.
Trupat izraelite dhe kolonët kanë vrarë më shumë se 640 palestinezë në Bregun Perëndimor që nga fillimi i luftës në Gaza tetorin e kaluar, ndërsa sulmet palestineze kanë vrarë të paktën 19 izraelitë.
Forcat izraelite kanë kryer vazhdimisht bastisje në Bregun Perëndimor, duke thënë se synimi është parandalimi i sulmeve të mundshme.
Hamasi i ka quajtur sulmet pjesë të një plani më të madh për të zgjeruar luftën në Gaza dhe duke fajësuar për përshkallëzimin, mbështetjen e SHBA-së për Izraelin.
Nabil Abu Rudeineh, një zëdhënës i Presidentit të Autoritetit Palestinez Mahmud Abbas, i dënoi sulmet si një “përshkallëzim serioz” dhe u bëri thirrje Shteteve të Bashkuara të ndërhyjnë.
Ndërkohë, Departamenti Amerikan i Shtetit dënoi të mërkurën në një deklaratë atë që e cilësoi si “dhunë ekstremiste nga kolonët (hebrenj) në Bregun Perëndimor”.
“Ajo shkakton vuajtje të mëdha njerëzore, dëmton sigurinë e Izraelit dhe minon perspektivën për paqe dhe stabilitet në rajon”, thuhet në deklaratë. “Është kritike që qeveria e Izraelit të mbajë përgjegjës çdo individ dhe entitet përgjegjës për dhunën kundër civilëve në Bregun Perëndimor”.
SHBA shpalli të mërkurën sanksione ndaj organizatës joqeveritare izraelite Hashomer Yosh, e cila, sipas zyrtarëve të Departamentit të Shtetit, pengoi kthimin e banorëve palestinezë në vendbanimet e tyre në Bregun Perëndimor në fillim të këtij viti.
Zyra e Kryeministrit Benjamin Netanyahu reagoi duke thënë se “Izraeli e dënon fuqishëm vendosjen e sanksioneve ndaj qytetarëve të Izraelit. Kjo çështje po diskutohet me forcë me Shtetet e Bashkuara”.
Izraeli pushtoi Bregun Perëndimor, Gazën dhe Jeruzalemin lindor në luftën e vitit 1967 në Lindjen e Mesme. Palestinezët duan që të treja territoret të jenë pjesë e një shteti të ardhshëm të tyre.
Qytetarët izraelitë kanë ndërtuar shumë vendbanime në të gjithë Bregun Perëndimor, ku aktualisht banojnë mbi 500,000 kolonë hebrenj. Ata kanë shtetësi izraelite, ndërsa 3 milionë palestinezë në Bregun Perëndimor jetojnë nën kontrollin ushtarak izraelit dhe Autoriteti Palestinez ushtron kontroll të kufizuar./VOA
