Kandidati republikan presidencial Donald Trump u zotua të kryejë dëbime masive të emigrantëve haitianë nga qyteti Springfield i Ohios.
Qyteti për ditë të tëra e ka gjetur veten në qendër të një vorbulle të mediave sociale pasi aktivistë të krahut të djathtë thanë se se emigrantët nga Haiti po hanin kafshë shtëpiake.
“Ne do bëjmë deportime të mëdha në Springfield, Ohio,” tha Trump në një konferencë shtypi në resortin e tij të golfit pranë Los Anxhelosit.
Shumica e 15,000 haitianëve në Springfield janë atje ligjërisht. Premtimi i kahershëm i Trump për të kryer deportime masive zakonisht u referohet atyre në vend në mënyrë të paligjshme.
Trump nuk e përsëriti pohimin që bëri gjatë debatit presidencial të së martës me demokraten Kamala Harris se emigrantët po hanin qen dhe mace, vërejtje që janë tallur gjerësisht.
Dy shkolla fillore u evakuuan dhe një shkollë e mesme në Springfield u mbyll të premten pas kërcënimeve anonime me bomba kundër komunitetit për të dytën ditë radhazi, sipas ABC Neës.
Në Shtëpinë e Bardhë, presidenti Joe Biden kërkoi që të pushojnë sulmet ndaj komunitetit haitian.
“Është thjesht e gabuar. Kjo nuk ka vend në Amerikë. Kjo duhet të ndalet. Duhet të ndalet,” tha Biden.
Administrata Biden zgjati Statusin e Mbrojtjes së Përkohshme për qindra mijëra haitianë në Shtetet e Bashkuara në qershor, një program i vjetër prej dekadash që mbron emigrantët e ligjshëm nga dëbimi dhe u jep atyre leje pune. Luftërat e bandave në Haiti kanë zhvendosur mbi gjysmë milioni njerëz dhe gati pesë milionë po përballen me pasiguri ushqimore.
