Hezbollahu në Liban ende po u dorëzonte anëtarëve të tij biperat e rinj të markës Gold Apollo disa orë përpara se mijëra pajisje të shpërthenin këtë javë, thanë dy burime sigurie, duke treguar se grupi ishte i sigurt se ata ishin jo të rrezikshëm pavarësisht një kontrolli të vijueshëm elektronik për të kapur kërcënime të mundshme.
Një anëtar i milicisë së mbështetur nga Irani mori një biper të ri të hënën që shpërtheu të nesërmen ndërsa ishte ende në kuti, tha një nga burimet.
Një biper që iu dha një anëtari të lartë vetëm ditë më parë plagosi një vartës kur shpërtheu, tha burimi i dytë.
Në një sulm të bashkërenduar në dukje, pajisjet e markës Gold Apollo shpërthyen të martën nëpër bastionet e Hezbollahut në Libanin jugor, periferitë e Bejrutit dhe luginën lindore Beka.
Të mërkurën, qindra radio marrësedhënëse të Hezbollahut shpërthyen. Sulmet e njëpasnjëshme vranë 37 njerëz, duke përfshirë të paktën dy fëmijë, dhe plagosën më shumë se 3,000 njerëz.
Libani dhe Hezbollahu thonë se Izraeli qëndronte pas sulmeve. Njësia sekrete e inteligjencës ushtarake e Izraelit, “Njësia 8200”, ishte e përfshirë në planifikim, i tha Reuters këtë javë një burim i sigurisë perëndimore. Izraeli, i cili që atëherë ka shtuar sulmet ajrore në Liban, as nuk e ka mohuar apo konfirmuar përfshirjen.
Bateritë e biperave ishin të pajisura me një përbërje shumë shpërthyese të njohur si PETN, tha për Reuters një burim tjetër libanez i njohur me përbërësit e pajisjes. Deri në tre gram eksploziv të fshehur në bipera kishin mbetur të pazbuluara për muaj të tërë nga Hezbollahu, raportoi Reuters në fillim të kësaj jave.
Një nga burimet e sigurisë tha se ishte shumë e vështirë për të zbuluar eksplozivët “me çdo pajisje apo skaner”. Burimi nuk specifikoi se çfarë lloj skanerësh kishte përdorur Hezbollah.
Hezbollah ekzaminoi biperat pasi ato u dorëzuan në Liban, duke filluar nga viti 2022, duke përfshirë udhëtimin nëpër aeroporte me ta për t’u siguruar që nuk do shkaktonin alarme, i thanë Reuters dy burime shtesë. Reuters foli me gjashtë burime të njohura me hollësitë e pajisjeve shpërthyese për këtë histori.
Burimet nuk kanë specifikuar emrin e aeroporteve ku janë kryer provat.
Në vend të një dyshimi specifik të biperave, kontrollet kishin qenë pjesë e një “pastrimi” rutinë të pajisjeve të tij, duke përfshirë pajisjet e komunikimit, për të gjetur ndonjë të dhënë se ato ishin të lidhura me eksploziv ose mekanizma vëzhgimi, tha një nga burimet e sigurisë.
Sulmet dhe shpërndarja e pajisjeve megjithë kontrollin rutinë, kanë goditur reputacionin e Hezbollahut si përfaqësuesja më e frikshme e aleatëve të Iranit të forcave anti-izraelite në gjithë Lindjen e Mesme.
Në një fjalim televiziv të enjten, Sekretari i Përgjithshëm i Hezbollahut, Hassan Nasrallah tha se sulmet ishin “të papara në historinë” e grupit.
Zyra për media e Hezbollahut dhe forcat e armatosura të Izraelit nuk iu përgjigjën menjëherë kërkesave për koment për këtë histori.
Gold Apollo me bazë në Tajvan ka thënë se nuk i ka prodhuar pajisjet e përdorura në sulm, duke thënë se ato janë prodhuar nga një kompani në Evropë e licencuar për të përdorur markën e firmës. Reuters nuk ka qenë në gjendje të përcaktojë se ku janë bërë ose në cilën pikë janë manipuluar.
Një grup prej 5,000 biperash u sollën në Liban në fillim të këtij viti. Reuters raportoi më parë se Hezbollahu iu drejtua përdorimit të biperave në një përpjekje për të shmangur mbikëqyrjen izraelite të telefonave të tij celularë, pas vrasjes së komandantëve të lartë në sulmet ajrore gjatë vitit të kaluar.
