Qyteti Hilario Ascasubi pranë bregut lindor të Atlantikut të Argjentinës ka një problem me papagajtë. Mijëra zogj në ngjyrë të gjelbër-verdhë-kuqe kanë pushtuar qytetin, të shtyrë nga shpyllëzimi në kodrat përreth, sipas biologëve. Ata kafshojnë kabllot elektrike të qytetit, duke shkaktuar ndërprerje energjie, dhe po i çmendin banorët me këngët e tyre të pandërprera.
“Shpatet e kodrave po zhduken dhe kjo po i bën ato të afrohen me qytetet për të gjetur ushqim, strehim dhe ujë,” tha biologia Daiana Lera, duke shpjeguar se shumë nga sipërfaqet pyjore të Argjentinës janë humbur gradualisht gjatë viteve.
Në vitet e fundit, papagajtë kanë filluar të mbërrijnë, duke kërkuar strehim në qytet gjatë vjeshtës dhe dimrit. Nganjëherë, sipas vendasve, ka deri në 10 papagaj për secilin prej 5000 banorëve njerëzorë të qytetit. Gjatë verës, zogjtë migrojnë në jug në shkëmbinjtë e Patagonisë për sezonin e shumimit.
Pamjet tregojnë qindra zogj të vendosur përgjatë kabllove elektrike dhe mbi shtylla, ose që vërshojnë mbi ndërtesa dhe drejt kishës, duke kujtuar në mënyrë të frikshme skenat në thrillerin klasik të Alfred Hitchcock të vitit 1963 “The Birds”.
“Ata kafshojnë dhe dëmtojnë kabllot, uji më pas mund të futet në tela kur bie shi dhe transmetimi ndërpritet. Këta papagaj na krijojnë kosto dhe probleme ditore,” tha Ramón Alvarez, një gazetar lokal për Radio Taxi Fm.
“Është e vetëkuptueshme që kur ikën rryma, nuk ka radio”.
Banorët kanë provuar metoda të ndryshme për t’i trembur, si zhurma dhe dritat lazer, por asgjë nuk ka funksionuar.
