Ushtria amerikane u ankua të hënën për një rrezik përplasje me një avion rus mbi ujërat asnjanëse në Alaskë, duke akuzuar pilotin rus të një avioni “Su-35S” për sjellje “joprofesionale”.
Incidenti ndodhi më 23 shtator, zbuloi në një deklaratë kreu i Komandës së Mbrojtjes së Hapësirës Ajrore të Amerikës së Veriut (NORAD), Gjenerali Gregory Guillot, kur avioni amerikan rrezikoi përplasjen me avionët ushtarakë rusë në Alaskë.
“Aeroplanit NORAD iu afruan avionët ushtarakë rus në Alaskë. Sjellja e një Su-35 ruse ishte e pasigurt, joprofesionale dhe i rrezikoi të gjithë. Nuk është diçka që do e shihni në një forcë ajrore profesionale”, tha komandanti.
Komanda publikoi një video të incidentit, marrë nga kabina e një avioni amerikan të përfshirë në incident, me sa duket një avion luftarak “F-16”. Pamjet tregojnë se avioni po i afrohet një bombarduesi strategjik rus “Tu-95MS” me aftësi bërthamore para se një avion shoqërues rus “Su-35S” t’i afrohet.
Paralajmërimi ishte me sa duket efektiv, me aeroplanin amerikan që ndryshoi befas drejtimin e tij dhe filloi të fluturonte larg bombarduesit.
Ushtria ruse nuk i është përgjigjur akuzave nga NORAD. Megjithatë, të martën e kaluar, Ministria e Mbrojtjes në Moskë lëshoi një deklaratë të shkurtër mbi misionin, pa përmendur ndonjë incident me avionin amerikan.
