SHBA-ja ka humbur respektin në skenën botërore dhe është bërë një objekt për t’u tallur, tha ish-presidenti Donald Trump në një event të fushatës në shtetin e Pensilvanisë.
Trump mbajti një tubim për të mbledhur mbështetjen për fushatën e tij zgjedhore në qytetin e Butler të shtunën, duke u kthyer në vendin ku i mbijetoi një atentati në korrik.
Kandidati republikan u zotua të rregullojë ekonominë amerikane, të luftojë krimin e dhunshëm dhe të godasë emigracionin e paligjshëm përmes kufirit jugor.
“Gjithçka duhet të jetë më e mira,” tha ai.
“Ne duhet të kemi shkollat më të mira. Duhet të kemi kufij të fortë. Ne nuk duam që njerëzit e këqij të vijnë dhe të na lëndojnë. Ju meritoni një vend që ndërton gjërat përsëri, i bën gjërat më të mira, që synon yjet edhe një herë dhe që përsëri kërkon respekt dhe ne duam të marrim respekt siç e kishim katër vjet më parë,” tha ai.
“E gjithë bota na respektoi. Ata na respektuan. Na respektuan më shumë se sa na kanë respektuar ndonjëherë dhe tani qeshin me ne.’
Gjatë gjithë fushatës së tij, Trump ka akuzuar administratën “e dobët” të Presidentit Joe Biden dhe kandidates demokrate, Kamala Harris, për dëmtim të reputacionit të Amerikës. Ai ka pohuar se luftërat në Ukrainë dhe Gaza nuk do kishin shpërthyer nëse ai do ishte ende president.
