Protestuesit antiqeveritar në kryeqytetin e Moldavisë, Kishinau, dolën në rrugë me pankarta dhe tenxhere bosh të shtunën, duke denoncuar presidenten e vendit Maia Sandu, dhe politikat e saj. Demonstruesit akuzuan administratën e Sandu se e ka çuar vendin drejt varfërisë. Protesta u quajt jozyrtarisht “Marshi i të uriturve”.
Videot tregojnë dhjetëra njerëz që marshojnë nëpër rrugët e Kishinaut me pankarta ku shkruhej: “Faleminderit Sandu, për varfërinë dhe urinë”, “Sandu, ik” dhe “Për Moldavinë pa BE”.
Njerëzit brohorisnin slogane që bënin thirrje për dorëheqjen e presidentes dhe goditnin tenxheret me lugë, duke brohoritur, “tenxheret bosh janë më të zhurmshme se fjalët”.
Marshimi u organizua nga lëvizja opozitare ‘Fitorja e të Rinjve’. Yuri Vitnyansky, udhëheqësi i lëvizjes, tha për RIA Novosti se protestuesit kërkojnë të tërheqin vëmendjen ndaj standardit të ulët të jetesës në vend në prag të sezonit të ngrohjes.
“Jemi në prag të sezonit të ngrohjes, po përballemi me sfida të reja të çmimeve të larta të gazit dhe energjisë elektrike. Ne e kuptojmë se kohë të vështira po vijnë jo vetëm për grupet e cenueshme shoqërore të popullsisë, por edhe për çdo banor të vendit”, tha ai, duke shpjeguar se zgjedhja e tenxhereve bosh si simbol i protestës ishte e qëllimshme.
Moldavia, që shtrihet midis Rumanisë dhe Ukrainës, është një ish-republikë sovjetike që u bë e pavarur në vitin 1991. Ajo kërkon anëtarësimin në BE dhe NATO që nga viti 2020, kur Sandu, një kritike e Rusisë dhe mbështetëse e integrimit në BE, erdhi në pushtet.
Vendi është ndër më të varfërit në Evropë dhe opozita e Sandu ka akuzuar administratën e saj për dështimin në zgjidhjen e krizës në sektorin e ekonomisë dhe energjisë dhe duke e çuar Moldavinë në varfëri më të thellë. Marshimi vjen përpara zgjedhjeve presidenciale në Moldavi, të cilat do përkojnë me referendumin për integrimin në BE, më 20 tetor.
