Gjykata Kushtetuese ka vendosur të lërë në fuqi çmimet e reja të referencës për pasuritë e paluajtshme në Tiranë, duke rrëzuar kështu kërkesën e Shoqatës së Ndërtuesve për pezullimin e tyre.
Ky vendim është marrë me unanimitet nga gjyqtarët e Gjykatës, të cilët argumentuan se Shoqata e Ndërtuesve nuk arriti të provojë efektet negative të këtyre ndryshimeve mbi aktivitetin e tyre. Sipas kryetares së Gjykatës Kushtetuese, Holta Zaçaj, nuk u vërtetuan pasojat e pariparueshme që do të sillnin këto çmime të reja.
Shoqata e Ndërtuesve ka pretenduar se rritja e referencave e vendosur në 2023 u ka shtuar kostot dhe ulur fitimet, dhe se çmimet e reja kanë efekt prapaveprues. Sipas tyre, kjo masë do të çojë në rritjen e kostove për qytetarët dhe krijimin e pasigurive ligjore për investitorët në tregun e pasurive të paluajtshme.
Nga ana tjetër, qeveria ka mbrojtur vendimin duke pohuar se referencat e reja pasqyrojnë më mirë realitetin e tregut dhe se vendimi synon të adresojë informalitetin dhe abuzimet në sektorin e ndërtimit. Përfaqësuesit e qeverisë kanë argumentuar se disa ndërtues i mbajnë pronat të pashitura qëllimisht për të rritur vlerën e tyre dhe se deklarojnë çmime më të ulëta se realiteti në kontratat e shitjes, duke dëmtuar tregun.
Vendimi për rritjen e çmimeve të referencës në Tiranë u miratua në vitin 2023, duke sjellë një rritje deri në 60% të tyre, në varësi të zonave kadastrale, dhe ka ngjallur shqetësime nga ana e ndërtuesve për ndikimin që kjo do të ketë mbi fitimet dhe operacionet e tyre.
