Një aksident ka ndodhur mëngjesin e sotëm në aksin Delvinë-Kardhiq.
Aksidenti ka ndodhur pranë fshatit Fushë Vërri, bashkia Delvinë.
Një automjet, i drejtuar nga shtetasi Engjëll Ogiçi, ka përplasur një banor, i cili po ecte në rrugë së bashku me një lopë dhe një gomar.
Viktima është identifikuar si Luan Xhuvani rreth 72 vjeç.
“Sot, rreth orës 03:45, në aksin rrugor Sarandë-Tuneli i Skërfices, në afërsi të rrethrrotullimit të fshatit Bajkaj, shtetasi E. O., 63 vjeç, dyshohet se ka humbur kontrollin mbi drejtimin e automjetit tip “Benz” dhe ka aksidentuar këmbësorin, shtetasin L. Xh., 72 vjeç, e më pas, është përplasur me një tjetër automjet tip “Benz”, me drejtues shtetasin V. G.
Si pasojë e aksidentit, shtetasi L. Xh. ka ndërruar jetë gjatë transportit për në spitalin e Sarandës.
Drejtuesi i automjetit, shtetasi E. O., u shoqërua në komisariat për veprime të mëtejshme.
Grupi hetimor vijon veprimet për zbardhjen e plotë të rrethanave të aksidentit”-thuhet në njoftimin e policisë.
