Bashkimi Evropian duhet të ndalojë së “ligjëruari” në pjesë të tjera të botës dhe të jetë më i respektueshëm ndaj partnerëve të tij nëse synon të luftojë ndikimin në rritje të Rusisë dhe Kinës, tha presidenti i Këshillit Evropian Charles Michel.
Në një intervistë me Financial Times të botuar të premten, Michel pranoi se blloku është “i bindur se ne e dimë se çfarë është e drejtë dhe çfarë është e gabuar” dhe shpesh nuk arrin të bëjë përpjekje për të kuptuar pse vendet e tjera mund të mendojnë ndryshe.
Ai vuri në dukje se në BE ekziston një “refleks që është si një forme ligjërate” kur komunikohet me vendet në zhvillim me të cilat blloku ka nënshkruar marrëveshje për bashkëpunim strategjik, tregtar apo politik.
“Ne nuk jemi gjithmonë shumë të mirë në aspektin e komunikimit, në aspektin e shpjegimit, për sa i përket bisedës me ta dhe shfaqjes së njëfarë respekti ndaj tyre”, tha Michel.
Ai sugjeroi gjithashtu që BE-ja duhet të rishikojë qasjen e saj për zbatimin e standardeve dhe rregulloreve të saj për partnerët tregtarë, duke dhënë si shembull rregullat e peshkimit.
“Ne përdorim fjalorin: karton i verdhë ose i kuq,” tha ai, duke theksuar se “fjalët që përdorim janë vërtet poshtëruese, sepse ne japim përshtypjen se jemi një lojtar në fushë dhe në të njëjtën kohë edhe arbitër”.
Vërejtjet e Presidentit të KE-së erdhën ndërsa dhjetëra liderë botërorë u mblodhën në Rusi këtë javë për të marrë pjesë në Samitin e 16-të të BRICS. Lista e të ftuarve përfshinte presidentët e Egjiptit, Emirateve të Bashkuara Arabe dhe Turqisë – një vend anëtar i NATO-s dhe kandidat për në BE.
Michel sugjeroi se fakti që liderët e këtyre vendeve, të cilët janë gjithashtu “shumë afër” me BE-në nga pikëpamja ekonomike dhe ushtarake, zgjodhën të marrin pjesë në Samitin e BRICS, sugjeroi se ata “duan të dërgojnë një mesazh për pjesën tjetër të botën.”
“Një nga emirët në vendet e Gjirit dikur më tha nëse ka vakum, shumë shpejt dikush do ta mbushë vakumin. Dhe nëse ju nuk jeni atje, të tjerët janë atje,” kujtoi Michel, duke theksuar se BE-ja duhet të gjejë “një qasje të re” për të fituar mbi vendet që dëshirojnë të diversifikojnë aleancat e tyre ekonomike dhe të sigurisë.
