Kreu i grupit parlamentar të PD-së Bardhi ka akuzuar kryeministrin Rama si orkestruesin e sulmit me vezë e kos ndaj eurodeputetit Fredi Beleri.
Ai tha se edhe incidenti në dyert e Kuvendit, ku Beleri u la jashtë, është orkestruar gjithashtu nga kreu i qeverisë.
“Sulmi fizik i orkestruar nga Edi Rama, në mjediset e jashtme të Kuvendit, ndaj eurodeputetëve është një akt që turpëron Shqipërinë. Pasi i mbyllën derën në hyrje, më pas në dalje kaluan në sulm fizik, duke shkelur kodin e shenjtë të mikëpritjes dhe të harmonisë ndër etnike. Pasi anulloi takimin në mënyrë të papritur me eurodeputetët, si skuth urdhëroi sulmin ndaj tyre, duke provuar edhe njëherë që nuk njeh limite ndaj kujtdo që nuk i shërben interesit të tij personal. Në emër të Grupit Parlamentar të PD, dënoj me forcë sulmin fizik ndaj eurodeputetëve dhe i bëj thirrje organeve ligjzbatuese të veprojnë menjëherë.” – tha Bardhi.
