Kina thuhet se ka furnizuar Rusinë me armë për përdorim kundër Ukrainës. Shefi i politikës së jashtme të BE-së Josep Borrell tani ka bërë thirrje për pasoja.
Bashkimi Evropian po shqyrton vendosjen e sanksioneve kundër Kinës, sepse vendi furnizoi Rusinë me armë për t’u përdorur kundër Ukrainës.
Siç thanë tre burime nga F.A.Z. (Frankfurter Allgemeiner Zeitung), shefi i politikës së jashtme të BE-së Josep Borrell informoi shtetet e BE-së për gjetjet e inteligjencës përpara një takimi të ministrave të Jashtëm të hënën dhe bëri thirrje për masa ndëshkuese. Provat ishin “bindëse” dhe treguan “dhënien e mbështetjes për Rusinë “, tha të premten një diplomat i lartë i BE-së.
“Tani duhet të shikojmë të gjithë paketën që BE-ja ka në dispozicion, duke përfshirë listat e reja të sanksioneve që çojnë në ndalimin e të bërit biznes me kompanitë kineze, ngrirjen e aseteve dhe ndalimin e importeve.” – tha diplomati.
Burimet nuk hynë në hollësi të gjetjeve të inteligjencës. Megjithatë, diplomati i lartë iu referua raporteve “shumë serioze” nga agjencia e lajmeve Reuters.
Në fund të shtatorit, ajo raportoi ekskluzivisht se një degë e kompanisë ruse të armëve “Almaz-Antey” e quajtur “Kupol” kishte zhvilluar dhe testuar një dron të ri luftarak me rreze të gjatë në Kinë dhe donte të krijonte prodhim të shumtë atje për përdorimin e këtyre dronëve në luftën kundër Ukrainës. Kjo është bërë me pjesëmarrjen e ekspertëve kinezë.
Nuk është e qartë nëse kjo ka ndodhur edhe me dijeninë e qeverisë kineze. Një zyrtar i lartë i BE-së tha se nuk kishte prova të qarta për këtë dhe ishte në kontakt me autoritetet kineze për këtë çështje. Ai shtoi: “Është e vështirë të imagjinohet që diçka e tillë të ndodhë dhe qeveria kineze të mos dijë asgjë për të.”
SHBA-ja po shqyrton gjithashtu sanksione
Sipas raportit, droni i ri Garpiya-3, ose shkurt G3, mund të transportojë një mjet shpërthyes që peshon 50 kilogramë deri në 2000 kilometra. Reuters citoi dy burime të agjencisë evropiane të inteligjencës dhe dokumente të tjera duke përfshirë komunikimet midis “Kupol” dhe Ministrisë ruse së Mbrojtjes dhe faturat.
Shtatë dronë ushtarakë u dorëzuan nga Kina në selinë e “Kupolit” në qytetin rus të Izhevsk, duke përfshirë dy të tipit G3. Data e dorëzimit dhe furnizuesi nuk janë të qarta nga faturat. Gjithashtu nuk dihet se ku ndodhen saktësisht objektet e prodhimit dhe zhvillimit në Kinë.
Kupol thuhet gjithashtu se ka njoftuar se brenda tetë muajve mund të prodhojë një dron luftarak të zhvilluar nga Kina të quajtur REM 1, i cili mund të mbante një ngarkesë shpërthyese prej 400 kilogramësh dhe ishte i krahasueshëm me dronin amerikan Reaper. Ka gjithashtu plane për një qendër të përbashkët kërkimore dhe zhvillimi ruso-kineze në zonën e posaçme ekonomike Kashgar në provincën Xinjiang.
Në përgjigje të raportit, BE-ja, NATO-ja dhe SHBA-ja shprehën alarmin në fund të shtatorit. Priten sqarime nga autoritetet kineze, tha një zëdhënëse e përfaqësuesit të Punëve të Jashtme Borrell. Nëse raportet janë të vërteta, ato do tregonin se Kina, në kundërshtim me pozicionin e saj zyrtar, po ofron mbështetje për Rusinë. Një zëdhënëse e NATO-s e quajti informacionin “shumë shqetësues”.
Një zëdhënës i Këshillit të Sigurisë Kombëtare të SHBA-së tha se megjithëse nuk kishte prova për përfshirje të drejtpërdrejtë të qeverisë kineze, ajo ishte përgjegjëse për kompanitë në Kinë që nuk furnizonin armë. Ndërkohë SHBA-ja po shqyrton sanksionet e veta.
VINI RE: Ky material është pronësi intelektuale e FAZ
Përgatiti për Hashtag.al, Klodian Manjani
