Ushtria ukrainase besohet të ketë marrë rreth 50 raketa ATACMS nga SHBA-ja deri tani, raportoi të martën The Times, ndërsa vuri në dukje se Pentagoni nuk ka publikuar publikisht ndonjë numër mbi armët.
Sipas gazetës britanike, forcat ushtarake të Ukrainës kanë “shumë” sisteme HIMARS dhe MLRS që janë në gjendje të lëshojnë raketa me rreze të gjatë.
Gazeta theksoi, megjithatë, se me një furnizim të kufizuar të raketave ATACMS, komandantët ushtarakë në Kiev do duhet “të përzgjedhin me kujdes objektivat brenda Rusisë”.
Të martën, Ministria ruse e Mbrojtjes njoftoi se Ukraina kishte lëshuar gjashtë raketa me rreze të gjatë ATACMS në rajonin kufitar të Bryansk dhe se pesë prej tyre u kapën nga sistemet e mbrojtjes ajrore, ndërsa një tjetër u dëmtua dhe u godit në tokë pranë një baze ushtarake.
Leja e përdorimit të raketave me rreze të gjatë veprimi për sulme thellë në Rusi është shqyrtuar në Shtëpinë e Bardhë prej më shumë se dy vjetësh. Të dielën, Neë York Times raportoi, duke cituar zyrtarë amerikanë të paidentifikuar, se presidenti amerikan në largim Joe Biden kishte hequr kufizimet ndaj Kievit duke i dhënë dritën jeshile për të bërë goditje brenda territorit rus.
Lajmi u konfirmua më vonë nga shefi i politikës së jashtme të BE-së në largim, Josep Borrell.
