Një grua nga Kalifornia i tha policisë se Pete Hegseth, i përzgjedhuri i Trump si Sekretar i Mbrojtjes, e kishte bllokuar fizikisht që të dilte nga dhoma e hotelit, i mori telefonin dhe më pas e sulmoi seksualisht, tregon një raport i policisë i marrë nga CNN.
Raporti prej 22 faqesh, i lëshuar nga zyra e prokurorit të Monterey, Kaliforni, të mërkurën në mbrëmje në përgjigje të një kërkese për të dhënat publike, paraqet hollësi të asaj që pretendohet se ka ndodhur, përfshirë pohime kontradiktore se sa të dehur ishin Hegseth dhe gruaja me videot që tregonin disa nga lëvizjet e tyre atë natë.
Hegseth, të cilin presidenti i sapozgjedhur Donald Trump e ka emëruar si të zgjedhurin e tij për Sekretar të Mbrojtjes, i tha policisë se takimi i tyre ishte konsensual dhe se ai vazhdimisht ishte siguruar që gruaja “të ndihej rehat me atë që po ndodhte mes tyre”.
Shtatë vjet pas sulmit të supozuar, pyetjet mbi atë që ndodhi atë natë mund të rrezikojnë emërimin e Hegseth dhe duket se do jenë qendrore në seancën e tij të ardhshme të konfirmimit.
Hegseth nuk u akuzua për krim në lidhje me pretendimin. Avokati i tij ka pranuar se Hegseth më vonë hyri në një marrëveshje me akuzuesen e tij që përfshinte një pagesë monetare të pazbuluar dhe një klauzolë konfidencialiteti. Megjithëse Hegseth këmbënguli se takimi ishte konsensual, avokati tha se kishte frikë se gruaja ishte gati të bënte një akuzë kundër tij gjatë lëvizjes #MeToo që mund t’i kishte kushtuar punën e tij si prezantues i Fox News.
Gruaja që akuzoi Hegseth për sulm shpërtheu në lot kur u pyet për këtë çështje nga gazetarët e CNN javën e kaluar dhe nuk pranoi të komentonte.
Sipas raportit të sapopublikuar të policisë, sulmi i supozuar ndodhi në orët e hershme të mëngjesit të 8 tetorit 2017, pasi Hegseth foli në një konventë të Federatës së Grave Republikane të Kalifornisë në “Hyatt Regency Monterey Hotel” një natë më herët.
