Qeveria greke do zbatojë një paketë subvencioni prej 100 milionë eurosh për të mbrojtur familjet dhe bizneset nga rritja e çmimeve të energjisë elektrike me shumicë. Plani përfshin subvencione direkte dhe lehtësime tatimore për konsumatorët, të kombinuara me një taksë të përkohshme mbi fitimet e prodhuesve të energjisë elektrike.
Subvencioni i parashikuar, i vlerësuar në 0.10 euro për kilovat-orë, është caktuar për të ndihmuar familjet dhe afërsisht 1.3 milionë biznese të vogla. Shuma përfundimtare e subvencionit do përcaktohet pas shpalljes së tarifave të dhjetorit nga ofruesit e energjisë.
Ministri i Energjisë Theodoros Skylakakis deklaroi se qeveria synon të mbajë çmimet e energjisë elektrike për familjet dhe bizneset e vogla nën 0,15 euro për kilovat/orë.
Për më tepër, plani do ofrojë subvencione shtesë për konsumatorët në nevojë, duke përfshirë ata me Tarifën Sociale Rezidenciale (KOT) dhe ata që përdorin energjinë elektrike për ngrohje, të cilët nuk mbulohen nga korniza e tanishme e ndihmës për ngrohje.
Ndërsa subvencionimi i bizneseve të vogla është i thjeshtë, qeveria përballet me sfida në mbështetjen e ndërmarrjeve të mesme dhe të mëdha për shkak të rregulloreve të BE-së për ndihmën shtetërore. Një subvencion i tërthortë nëpërmjet lehtësimit të tatimit mbi fitimin është në shqyrtim, megjithëse përjashton kompanitë me humbje. Qeveria duhet gjithashtu të trajtojë vjedhjet e përhapura të energjisë elektrike, që ka arritur në 80% në disa sektorë.
Për të parandaluar subvencionet e dyfishta, aplikimet do dorëzohen përmes një platforme elektronike, ku aplikantëve u kërkohet të deklarojnë ndihmën kumulative të marrë dhe të marrin certifikimin nga operatori i shpërndarjes së energjisë elektrike. Subvencionet do financohen nga një taksë e jashtëzakonshme mbi fitimet e prodhuesve të energjisë elektrike, me qëllim minimizimin e ndërprerjeve të tregut.
Analistët parashikojnë çmime edhe më të larta të energjisë elektrike në Evropë për shkak të varfërimit të shpejtë të rezervave të gazit natyror, një dimri të ashpër, përshkallëzimit të luftës në Ukrainë dhe skadimit të kontratave të tranzitit rus.
Sanksionet e SHBA-së ndaj Gazprombank, që do hyjnë në fuqi më 20 dhjetor, do ndikojnë më tej në sigurinë e energjisë dhe çmimet e gazit në Evropë. Çmimi i gazit TTF është rritur në 49 euro për megavat-orë, me Goldman Sachs që paralajmëron se mund të arrijë në 77 euro nëse vonesat e projektit GNL vijojnë.
Në nëntor, çmimi i energjisë elektrike me shumicë i Greqisë ishte mesatarisht 138,95 euro për megavat-orë, 51,8% më i lartë se në tetor, duke përjashtuar ndikimin e vonuar të rritjes së çmimit të gazit. Kjo rritje e ndjeshme nënvizon nevojën e menjëhershme për ndërhyrjen e qeverisë për të lehtësuar barrën financiare për konsumatorët dhe bizneset.
VINI RE: Ky material është pronësi intelektuale e Ekathimerini
Përgatiti për Hashtag.al, Klodian Manjani
