Bashkimi Evropian ka urdhëruar TikTok-un të ngrijë të dhënat e lidhura me zgjedhjet në Rumani. Zyrtarët e BE-së lëshuan një “urdhër ngrirjeje” sipas Aktit të Shërbimeve Dixhitale gjithëpërfshirëse të bllokut, i cili rregullon se si operojnë kompanitë më të mëdha të mediave sociale në Evropë.
Masa vjen në të njëjtën ditë kur Shtetet e Bashkuara shprehën shqetësime për ndërhyrjen e mundshme të huaj në zgjedhjet e Rumanisë, pasi ultranacionalisti pro-rus Calin Georgescu fitoi në raundin e parë të garës presidenciale më 24 nëntor.
Partitë e ekstremit të djathtë gjithashtu u paraqitën mirë në zgjedhjet parlamentare të Rumanisë të dielën e kaluar, megjithëse socialdemokratët e majtë në pushtet u shfaqën si partia më e madhe dhe shpresojnë të krijojnë së bashku një qeveri koalicioni pro-BE.
Dokumentet e deklasifikuara nga zyrtarët rumunë të sigurisë të mërkurën treguan se Georgescu u promovua masivisht në platformën e mediave sociale TikTok përmes llogarive të bashkërenduara, algoritmeve dhe promovimit me pagesë. Vetë Georgescu deklaroi zero fonde të shpenzuara në fushatë, shkruan Reuters.
Dokumentet sugjeronin se Rumania kishte qenë objektiv i “sulmeve hibride agresive ruse”. Rusia ka mohuar çdo ndërhyrje në fushatat zgjedhore të Rumanisë.
Nëse Georgescu pretendon fitoren në votimin e balotazhit të kësaj të diele, ai ka të ngjarë të përpiqet të izolojë Rumaninë dhe të ndryshojë qasjen e saj pro-BE, kanë thënë analistët dhe diplomatët.
Një zëdhënës i Tiktok tha: “Ne kemi qenë tashmë duke bashkëpunuar me Komisionin Europian dhe do vijojmë ta bëjmë këtë. Ne mezi presim të vërtetojmë faktet në dritën e disa prej spekulimeve dhe raporteve të pasakta që kemi parë.”
