Presidenti ukrainas Volodymyr Zelensky tha se ai pati një “takim të mirë dhe produktiv trepalësh” me presidentin e zgjedhur të SHBA-së, Donald Trump dhe presidentin francez Emmanuel Macron në Pallatin Elysee të shtunën.
“Ne të gjithë duam që kjo luftë të përfundojë sa më shpejt të jetë e mundur dhe në mënyrë të drejtë”, tha Zelensky në një postim në X, duke shtuar se të tre vendet kanë rënë dakord të vazhdojnë të punojnë së bashku, shkruan CNN.
Zelensky tha gjithashtu për presidentin e zgjedhur: “Presidenti Trump është, si gjithmonë, i vendosur”.
Trump dhe Zelensky fillimisht ishin vendosur të zhvillonin bisedime të veçanta të njëpasnjëshme me Macron.
Zelensky tha javën e kaluar se ai dëshiron të punojë “direkt” me Trump dhe se ai është i hapur ndaj ideve të tij, duke theksuar dëshirën e Kievit për të mbajtur aleatin e tij më të rëndësishëm, ndërsa Rusia intensifikon sulmet e saj.
Shtetet e Bashkuara janë ofruesi i vetëm më i madh i ndihmës ushtarake për Ukrainën në luftën e vendit kundër Rusisë. Trump ka hedhur dyshime mbi ndihmën e vazhdueshme të SHBA-së për Kievin dhe ka pohuar vazhdimisht se lufta nuk do të kishte nisur nëse ai do të kishte qenë president. Në korrik, ai tha se mund ta zgjidhte luftën brenda një dite, pa thënë se si do ta bënte këtë.
