Ministri Balla hodhi poshtë akuzat e PD-së lidhur me opinionin e Komisionit të Venecias dhe vendimin e Gjykatës Kushtetuese për mandatin e Olta Xhaçkës.
Gjatë fjalës në seancë ai tha se Venecia kishte konfirmuar të drejtën e parlamentit për të votuar çështje që janë brenda kompetencës së tij. Ai nënvizoi se mazhoranca ka respektuar ndarjen e pushteteve dhe parimet e Kushtetutës.
“Unë nuk mbaj mend ndonjëherë një opinion të Venecias ku humbësit të mos e konsiderojnë si fitore, ndoshta se për shkak të matematikës 59 ju duket më e madhe se 2. Po të ishit ju, që kishit të drejtë, minimalisht kur kuvendi u mblodh dhe votoi, ju do kishit marrë fjalën e do kishit thënë do respektojmë vendimin e Gjykatës Kushtetuese nuk do shkojmë në votim. Më vjen mirë që opinioni i Venecias ka shkruar të zezë mbi të bardhë se parlamenti nuk është i detyruar të votojë në një mënyrë të caktuar, por gjthmonë është në gjendje të votojë çështje brenda kompetencës së vet. Çfarë ka bërë kuvendi? Ka votuar mbi çështje që kanë kompetencë sipas asaj që i ka përcaktuar Kushtetuta. Nëse nuk do t’i kishit sytë e mbyllur nga politika, siç i keni për fat të keq, do vinit këtu e do thonit që është respektuar ndarja e pushteteve, e një ditë mund të çohet Gjykatës Kushtetuese e të thotë nuk do të bëni më ligje se do i bëj unë. Jemi republikë parlamentare. Mos harroni se Komisioni i Venecias investohet mbi bazën e pyetjeve që i shkojnë. Pyetjet që i kanë shkuar ndoshta nuk i keni lexuar.” – tha Balla.
