Policia e Shtetit ka ndaluar autorin e dyshuar të plagosjes së ndodhur brenda ambienteve të shkollës në Cakran të Fierit.
Policia shoqëroi 17-vjeçarin B.D për veprën penale “Vrasje me dashje, e mbetur në tentativë”.
Konflikti midis të miturve ka nisur pasi i plagosur H. Xh., pretendonte se autori i dyshuar, shtetasi B. D., shpërndante në rrjetet sociale fotografi të tij.
“Në vijim të informacionit paraprak të dhënë ditën e djeshme, për një plagosje me mjet prerës (thikë), në shkollën e mesme “Mustafa Hoxha”, Cakran, ku mbeti i plagosur shtetasi i mitur, H. Xh., 17 vjeç, ju informojmë se:
Specialistët për Hetimin e Krimeve të Rënda të DVP Fier nën drejtimin e Prokurorisë së Rrethit Gjyqësor Fier arrestuan autorin e dyshuar, shtetasin e mitur, B. D., 17 vjeç, për veprën penale “Vrasje me dashje”, e mbetur në tentativë.
Konflikti midis shtetasve të mitur ka nisur pasi shtetasi i dëmtuar H. Xh., pretendonte se autori i dyshuar, shtetasi B. D., shpërndante në rrjetet sociale fotografi të tij.
Shtetasi H. Xh., aktualisht ndodhet në spital për ndihmë mjekësore, jashtë rrezikut për jetën.
Mjeti prerës (thikë), u sekuestrua në cilësinë e provës materiale.
Materialet procedurale i kaluan Prokurorisë për veprime të mëtejshme”-njofton policia.
