Deputetja e Partisë Demokratike, Jorida Tabaku, ka publikuar një video në rrjetet sociale me titull “Ditari i Javës”, ku ngre shqetësimin për moszbatimin e vendimeve të Gjykatës Kushtetuese nga mazhoranca. Sipas Tabakut, ky veprim përbën një shkelje të parimit të barazisë përpara ligjit dhe minon rendin kushtetues.
Ajo argumenton se veprimet e shumicës reflektojnë një mungesë përgjegjshmërie dhe dëshirë për të respektuar ligjin në mënyrë të barabartë për të gjithë qytetarët.
Sipas saj, ky qëndrim jo vetëm që dëmton rendin ligjor, por ndikon drejtpërdrejt në përkeqësimin e situatës ekonomike të vendit, duke rënduar financat e familjeve shqiptare.
Tabaku theksoi gjithashtu se shumica, e cila shpërfill vendimet e Gjykatës Kushtetuese, ka miratuar ligje të hartuara sipas interesave të ngushta, të cilat kanë ndikuar negativisht në ekonominë kombëtare, duke nxitur rritjen e çmimeve dhe përkeqësuar gjendjen financiare të qytetarëve.
Në mesazhin e saj, deputetja demokrate bën thirrje për një qeverisje më të përgjegjshme dhe respektim të plotë të ligjit për të gjithë.
